O pasado sábado os corredores da ED Lourenzá participaron na Clásica dos Lagos de Covadonga, onde participaron preto de 3000 ciclistas. O equipo da sección de ciclismo laurentina estivo formado por Peixe, Luís, Félix, Andrés, Diego, Longarela e Paco. A competición non foi doada xa que tiveron que superar en plena proba un desnivel de 1200 metros. A vindeira saída está prevista para este domingo día 23 de xuño cando representarán ás ED Lourenzá en As Pontes no Desafío das Fragas do Eume, cunha participación duns 10 ciclistas.

Organizadas pola ACIA de Alfoz, veñen de iniciarse este mércores día 19, unhas visitas escolares ó concello de Alfoz e ó Val do río Ouro. Vinte e un alumnos do instituto Illa de Sarón de Xove, acompañados de dous profesores, pasarán tres días polas nosas terras. Estas visitas inclúen unha chea de actividades deportivas, lúdicas e culturais, para a realización das cales colaboran diversas entidades locais, dende o mesmo concello ata asociacións culturais, deportivas, empresas, etc. A finalidade é procurar uns días de diversión ós escolares que veñan e, ó mesmo tempo, potenciar o aspecto turístico do Val.

O salón de actos da Casa do Concello de Lourenzá acollerá un curso de manipulador de alimentos este vindeiro sábado, día 22, a partir da dez da mañá. Esta actividade formativa está organizada polo Concello de Lourenzá e a empresa Sea, qué unha firma dedicada a traballos de laboratorio, asesoría alimentaria e centro de formación. O prezo da matrícula é de 30 euros e os interesados en inscribirse ou obter máis información poden dirixirse aos teléfonos 690.012.783 ou 982.121.006.

A Asociación de Veciños do Burgo de Trasbar ten previsto celebrar o San Xoán o vindeiro 22 de xuño. As actividades darán comezo a partir das 19 horas nas inmediacións do local social de Trasbar e logo desfrutaremos dunha chorizada/pancetada que rematará coa queima da fogueira sobre a media noite. Agardan a participación de gran número de persoas, xa que é unha actividade dirixida a socios e tamén ós non socios.

ACISA entregou os premios do concurso convocado para elixir o slogan da próxima edición do Ribadeo aberto, que terá lugar o próximo 5 de xullo. 'Ribadeo aberto, paseo entre desexos' foi o slogan gañador. O seu autor é Marc Monforte Farnós que concorreu ó concurso co pseudónimo de Ni + ni -. El levarase 200 euros en vales de compra para gastar nos establecementos asociados a ACISA. O segundo premio de 100 euros en vales de compra foi para José Carlos Díaz Blanco. O seu slogan foi o que reuniu máis "Me gusta" en Facebook. O seu lema: 'Vén a Ribadeo e déixate levar polo seu encanto'.

O equipo de I+D+i de Quescrem, especialista en queixo crema e primeira empresa láctea galega de base tecnolóxica, desenvolveron o primeiro queixo crema español 0% sen lactosa, un producto único no mercado que agora, en virtude dun acordo entre Quescrem, Adilac e Gadisa, poderán probar gratuitamente todos os membros da Asociación Española de Intolerantes á lactosa (ADILAC) que teñan un establecemento Gadis preto do seu domicilio. A opción de probar o 0% terana tamén os seguidores das redes sociais de Quescrem, xa que se repartirán tarrinas de proba para aqueles que queiran coñecer esta nova tecnoloxía, que aplicarán baixo demanda tamén ó sector profesional. O desenvolvemento deste novo queixo foi potenciado polo interese de Quescrem de traballar na innovación de produtos dirixidos a aqueles sectores da poboación con restriccións alimenticias, un sector cada vez máis amplo e que demanda o acceso a todo tipo de alimentos.

Éxito da charla sobre preferentes e subordinadas celebrada onte en Ribadeo organizada por ACISA. O salón de actos da Casa Sindical estivo repleto para escoitar as explicacións dos abogados lucenses Miguel Fernández Freire e Patricio Viveiro Fernández, expertos nesta materia que recomendaron ós afectados acollerse ó canxe por diñeiro ofrecido por Nova Galicia Banco para non quedarse en ningún caso con accións desa entidade bancaria. Os letrados tamén insistiron na conveniencia de aceptar as condiciones plantexadas ós que son chamados para a arbitraxe, porque é a mellor solución. Ademais explicaron que aqueles afectados que non foron convocados para a vía arbitral deben analizar a posibilidade de presentar unha demanda xudicial, que non compensa en todos os casos, segundo aclararon. A de onte foi a segunda charla sobre preferentes e subordinadas que organizou a Asociación de Comerciantes, Industriais, Servizos e Autónomos de Ribadeo.