Xove acolle unha nova edición, a terceira, do Campus de Ximnasia Rítmica dende o luns 21 de xullo ata este venres 25.
En total están participando 60 ximnastas, procedentes de distintas zonas e de clubs de toda a Provincia. A organización deste Campus corre a cargo da Escola Municipal de Ximnasia Rítmica de Xove, do Club Violeta e do Club Filigrana.
O centro de actividades do Campus é o Pavillón Municipal de Deportes, pero tamén se realizan actividades na Aula de Formación (cláses teóricas e vídeos), Piscina (actividades lúdicas) e o Salón de Actos (comidas e zona de descanso).
Durante estes días as ximnastas están a realizar numerosas actividades co mundo da ximnasia, dende os clásicos adestramentos ata talleres de maquillaxe, deseño de tocados e maillots, etc. As xornadas rematan sempre con actividades de carácter lúdico e recreativo na Piscina Municipal.
O equipo formativo deste Campus está formado polas monitoras: Ana Iglesias, Paula Iglesias, Yaiza Vilela e Cristina Iglesias. Temos que salientar neste sentido a presencia en Xove da entrenadora do Club Esquio de Ferrol, a ex-ximnasta internacional rusa Irina Boudarina, a cal mostrou os seus coñecementos da típica e gran escola rusa.