26 de Setembro de 2018

Correo | Favoritos  | Imprimir   

Presentación oficial de Jenny

07-03-18

Burela 7-3-18. A lusa Jennifer Santos Rodrigues, máis coñecida como Jenny, foi presentada oficialmente esta mañá na sede burelista, na compaña do presidente, Manuel Blanco, e do secretario, José Dovale. “O Pescados Rubén Burela FS é un dos mellores equipos que hai en España e a liga española é un dos campionatos máis respectados do mundo” confesaba a nova 9 laranxa, que xa estará á disposición de Julio Delgado e Lucas para saltar á pista a vindeira xornada.

Esta será a súa segunda experiencia deportiva fóra de Portugal, despois de comezar a tempada na Seria A italiana, co Pescara. “En termos de intensidade hai máis diferenza entre o fútbol sala español e o portugués, co italiano non tanto. Tamén é máis competitivo o español, con 4-5 equipos en pugna polo título” analizaba así a súa bagaxe Jenny, cun novo reto por diante que afronta con ilusión e afán de superación: “Espero aprender o máis rápido posible para poder axudar o equipo nesta recta final. Espero evolucionar e chegar o máis lonxe posible, espero que a axuda entre o equipo e eu sexa recíproca. Creo que podo medrar neste equipo, sobre todo a nivel táctico porque hai xogadoras moi boas; para min Cilene é unha referencia, é unha das mellores xogadoras que vin”, explicaba a nova ala laranxa, de 25 anos, que recalou na Mariña o domingo.

A portuguesa, que xa se incorporou á dinámica do equipo ao comezo da semana, chega co “un contra un e raza en defensa” como as súas mellores armas. “Só coñecía de vista a Sara Correia, enfronteime nun partido a ela. Gústame moito o equipo, pola unión que ten” transmitía así as súas primeiras sensacións Jenny.

Manuel Blanco e José Dovale aplaudiron a chegada da 9 laranxa como “un reforzo prometedor para seguir pelexando por grandes soños nesta excelente tempada”.

Website Pin Facebook Twitter Myspace Friendfeed Technorati del.icio.us Digg Google StumbleUpon Premium Responsive