15 de Decembro de 2018

Correo | Favoritos  | Imprimir   

A Xunta salienta a participación de Sargadelos no programa deseño para a innovación 2020

10-08-18

Cervo, 10 de agosto de 2018.- A directora da Axencia Galega de Innovación (Gain), Patricia Argerey, visitou a empresa de cerámica Sargadelos para coñecer in situ o renacer que está vivindo a compañía vencellado ao deseño e á innovación.

Argerey destacou o papel de Sargadelos como firma de referencia en Galicia no ámbito do deseño, a innovación e a promoción da cultura galega e agradeceu a súa colaboración no programa Deseño para a Innovación 2020, que a Xunta está desenvolvendo con todos os axentes do sistema de innovación co obxectivo de fomentar a incorporación e sistematización do deseño, en todas as súas vertentes -gráfico, de produto, organizacional ou dixital- nas empresas galegas, especialmente nas pemes.

Sargadelos constitúe, en palabras de Argerey, un exemplo de empresa que aúna o deseño e a innovación desde os seus inicios. De feito, as Reais Fábricas de Sargadelos, postas en marcha por Raimundo Ibáñez nos séculos XVIII-XIX, foron un dos primeiros exemplos de industrialización en Galicia.

Posteriormente, no proxecto retomado por Isaac Díaz Pardo e Luis Seoane a creatividade e a innovación cobraron aínda máis forza, coa creación do Laboratorio de Formas que xuntaba a investigación e o deseño tradicional galego e a innovación na produción, na que empregan maquinaria deseñada e creada exclusivamente para ese fin.

Actualmente, a empresa está a experimentar un relanzamento grazas á incorporación da innovación e do deseño en todas as súas vertentes e coa apertura de novas liñas de produción como mantelaría e marroquinaría.

A Xunta, deste xeito, busca a colaboración do grupo empresarial, como un referente no ámbito do deseño e da innovación, na rede de axentes, unha das primeiras actuacións dentro do programa Deseño para a Innovación 2020, unha iniciativa que forma parte do Plan Galicia Innova 2020 e que nace da vontade de integrar dun xeito pioneiro o deseño nas políticas públicas de innovación coa convicción de que éste constitúe un factor clave na competitividade e na produtividade das empresas.

Os obxectivos deste programa, no que se investirán ao redor de 2 millóns de euros, son mellorar o coñecemento e a comprensión do deseño como un factor estratéxico para a innovación e a competitividade empresarial máis aló do seu valor estético; capacitar a empresas e emprendedores para que invistan en deseño e promovan a innovación en novos produtos, servizos, procesos e estratexias de negocio; e poñer en valor a figura do deseñador industrial como elemento clave na diferenciación das empresas.

A Axencia Galega de Innovación (Gain) conta con experiencia previa en deseño e innovación a través da súa participación nos proxectos europeos Design4Innovation e USER FACTOR.

Website Pin Facebook Twitter Myspace Friendfeed Technorati del.icio.us Digg Google StumbleUpon Premium Responsive