23 de Abril de 2019

Correo | Favoritos  | Imprimir   

O BNG de Mondoñedo inicia unha campaña de información polas parroquias para explicar as distancias regulamentarias que se deben cumprir en materia de prevención de incendios forestais

11-02-19

Mondoñedo, 11 de febreiro do 2019. O voceiro do BNG no concello, Eloi Cabanas, explica que o BNG presentou unha moción no pleno de febreiro de 2018 para que o goberno municipal emprendera unha campaña de concienciación polas parroquias e explicara, tendo en conta a Lei de Montes e a Lei de Prevención de Incendios da Xunta de Galicia, as obrigas dos particulares relativas á xestión das franxas perimetrais de biomasa nos terreos forestais e zonas de influencia forestal así como as medidas que vai tomar o goberno en caso de que non se cumpran.
“A moción aprobouse por unanimidade, e un ano despois a alcaldesa non foi quen de cumprir o acordo plenario”. O edil nacionalista apunta que o goberno municipal só foi capaz de recordarlle por carta á veciñanza que existen normativas de obrigado cumprimento e de distribuír un díptico, que a día de hoxe non está actualizado tendo en conta a Lei de acompañamento dos orzamentos da Xunta de Galicia para o ano 2019, informando das distancias de plantación e das franxas de xestión da biomasa.
Eloi Cabanas aclara que antes de que remate o mes de maio é obrigatorio xestionar a biomasa no ámbito de todas as redes de faixas de xestión, incluída a retirada de especies arbóreas se é o caso, e se as persoas responsables de acometer estes traballos non o fan, expóñense á posibilidade dunha execución subsidiaria do concello ou ben da administración autonómica en función do ámbito súas competencias.
Cabanas recorda que o concello de Mondoñedo está adherido ao convenio asinado entre a Xunta de Galicia, Fegamp e Seaga no cal se establece un sistema público de xestión de biomasa nas franxas secundarias.
Segundo este convenio, o concello debe elaborar un plan básico de prevención de incendios no que debe incluír a delimitación das franxas de prevención dos núcleos de poboación e a identificación dos propietarios das parcelas afectadas.
Tamén está previsto que o concello abra un prazo para que os veciños que o desexen podan solicitar os desbroces bonificados a un prezo establecido de 350€/Ha.
“Faltan case tres meses para que remate o prazo establecido na Lei e aínda queda moito traballo por facer, por iso desde o BNG local tomamos a iniciativa de informar polas parroquias do concello co obxectivo de dar a coñecer á veciñanza a normativa de obrigado cumprimento en materia de prevención de incendios forestais”.

Website Pin Facebook Twitter Myspace Friendfeed Technorati del.icio.us Digg Google StumbleUpon Premium Responsive