17 de Novembro de 2019

Correo | Favoritos  | Imprimir   

O Concello de Cervo organizou unha visita guiada pola Ruta das Canteiras na que participou medio cento de persoas

13-08-19

 Cervo, 13 de agosto de 2019.- O Concello de Cervo, a través da delegación de Turismo, organizou para o día de hoxe unha visita guiada pola Ruta das Canteiras na que participou medio cento de persoas.
Os asistentes, entre os que se atopaban o rexedor, Alfonso Villares, e o edil de Turismo, David Rodríguez, puideron coñecer o pasado canteiro de San Ciprián da man do investigador do instituto Geológico y Minero de España, Jorge Fernández.
O roteiro, de dúas horas de duración, partiu ás 11:15 horas do Faro da Atalaia, e desde alí percorreron zonas como a Praia de Cubelas, a Ponte Medieval, as antigas Fábricas de Salgadura ou Punta Mingarolo.
No percorrido poden detectarse vestixios do traballo dos canteiros ao longo dos séculos en forma de frontes, bancos de traballo, trincheiras, cuñas e barreños, para extraer os sillares cos que logo se construíron as edificacións tradicionais da vila.
Ao longo da ruta instaláronse diferentes fitos que nos permiten afondar no pasado canteiro de San Ciprián; de onde se exportaron as laxas que se empregaron, por exemplo, para o empedrado da Praza Maior de Oviedo.
Villares precisou que desde o Concello estamos a facer unha aposta decidida pola divulgación e a posta en valor de todo o noso patrimonio natural e arquitectónico, “porque cremos que é fundamental traballar pola súa preservación e dalo a coñecer a toda a veciñanza pola importancia que ten na nosa historia”.
De feito, Cervo foi o primeiro municipio galego que se incorporou á rede de patrimonio natural e arquitectónico “Construrock” en novembro do pasado ano, un protocolo de colaboración que ten o obxectivo de promover a realización de actuacións científico-técnicas en materia de xeoloxía, pedra natural e patrimonio arquitectónico do municipio, en colaboración co Instituto Geológico y Minero de España.

Website Pin Facebook Twitter Myspace Friendfeed Technorati del.icio.us Digg Google StumbleUpon Premium Responsive