Nota de Prensa
Villares e Salgueiro deron a coñecer esta iniciativa no contorno onde estaba proxectada este cinto industrial
OS ALCALDES DE CERVO E XOVE PRESENTARÁN DIANTE DOS SEUS PLENOS SENLLAS PROPOSTAS INSTANDO Á XUNTA A QUE VOLVA A INCLUIR O POLÍGONO SUPRAMUNICIPAL NO PLAN SECTORIAL DE GALICIA
Cervo 20 de setembro de 2008.- Os alcalde de Xove e de Cervo, Demetrio Salgueiro e Alfonso Villares respectivamente, anunciaron hoxe na zona próxima á factoría de Alcoa a súa intención de presentar diante dos seus respectivos plenos unha proposta de alcaldía instando á Xunta a que deixe sen efecto o acordo do Consello do Goberno galego adoptado o pasado 31 de xullo, e que se volva a incluír no Plan Sectorial de Áreas Empresariais de Galicia o cinto industrial en torno a esta industria do aluminio.
Para os dous representantes municipais a supresión por parte dos responsables da Xunta deste parque industrial supramunicipal proxectado dende o ano 2002 e incluído dentro de citado plan sectorial galego de áreas industriais é un agravio ás potencialidades e ao desenvolvemento non só dos concellos de Cervo e Xove “senón tamén de toda a comarca da Mariña” asegurou o alcalde xovense, Demetrio Salgueiro.
Os dous alcaldes rexeitaron os argumentos esgrimidos dende a Consellería de Vivenda para refugar esta infraestrutura dotacional que foi aprobada e proxectada polo anterior goberno da Xunta de Galicia. Segundo Salgueiro e Villares, o motivo dado por Vivenda para non facer este parque aducindo que non se adapta a criterios racionais é algo “incomprensible”. “O que é máis que evidente -e todo o mundo sabe- é que si hai un lugar onde se xustifique máis a necesidade de solo industrial é precisamente aquí, en torno a unha das principais empresas de Galicia” asegurou Alfonso Villares. Así mesmo, o cervense recalcou que esta reivindicación do seu concello e do de Xove non se basea en ideolóxías “se non no simple sentido común”.
IRRACIONALIDADE
Salgueiro e Villares tamén se referiron á manifestación do pasado día 9 convocada polo BNG solicitando a apertura do dique norte de Alcoa ao tráfico portuario xeral. Para os dous alcaldes, o proceder do BNG en torno a este tema é irracional, “xa que por unha banda piden a apertura do dique de Alcoa, mentres que en Santiago se cargan a creación dun solo industrial que sería imprescindible para Alcoa e tamén para ese futuro porto comercial polo que se manifestaron”.
Os edís de Cervo e Xove recalcaron que estaban de acordo coa reivindicación nacionalista en solicitar a apertura do dique de Alcoa “pero pedímoslles tamén que fagan autocrítica e que sexan consecuentes entre o que piden e o que fan”.
O alcalde de Xove afondou neste tema e lembrou que a Consellería de Vivenda e Solo denegou fai un ano a solicitude de Xove de situar un parque empresarial na zona de Beltrán aducindo que próximo a ese lugar xa estaba previsto acometer o parque supramunicipal “e un ano máis tarde a mesma consellería nos di agora que non fai o parque supramunicipal porque non se axeita a criterios racionais” asegurou Salgueiro.
Os dous alcaldes confiaron en que as mocións poidan saír adiante por unanimidade nos seus respectivos municipios “porque non se trata de política senón do futuro de Cervo, Xove e da Mariña” recalcou Villares. Ademais, os dous Concellos tamén teñen previsto dirixírse ao resto de axuntamentos da Mariña para recabar o seu apoio cara a conseguir que a Xunta volva a integrar o cinto industrial de Alcoa dentro do Plan Sectorial de Áreas Empresariais de Galicia.
* Copia da moción a tratar nos dous concellos
* Comunicación Consellería de Vivenda deixando sen a creación do polígono supramunicipal Cervo-Xove (8-09-08)
* Comunicación da Consellería de Vivenda denegando a petición de Xove de crear un polígono na zona de Beltrán (23-3-07)