Nota de Prensa
Innovación e Industria recupera e amplía o museo catedralicio e diocesano de Mondoñedo
Fernando Blanco visitou as estancias do pazo episcopal rehabilitadas para a ampliación e mellora do museo, que se dotará dun proxecto museolóxico completo
A Consellería de Innovación e Industria investirá ata a conclusión do proxecto a finais de ano un total de 655.000 euros
Santiago de Compostela, 10 de outubro de 2008. A Consellería de Innovación e Industria vén de investir 475.000 euros na rehabilitación de tres salas e do patio do pazo episcopal de Mondoñedo, así como en diversas obras de saneamento da fachada sur do mesmo edificio. Os espazos recuperados acondicionaranse para a ampliación e mellora do Museo Catedralicio e Diocesano, segundo explicou hoxe o titular de Innovación e Industria, Fernando Blanco, que visitou o pazo mindoniense e anunciou ademais un investimento adicional de 180.000 euros para dotar o museo dun proxecto museolóxico completo e coherente.
De cara a final de ano, segundo dixo o conselleiro, estará concluída a montaxe dos paneis e das pezas do museo, para que a través do total das súas seis salas e o patio se poida facer un percorrido interpretativo pola longa historia da diocese. O conxunto de pezas de arte sacra dende a idade media até o barroco, pasando polo Renacemento, serán máis accesíbeis para os visitantes, o que significa, a xuízo de Fernando Blanco, a posta en valor dun rico patrimonio e a ocasión de xunguilo coa tradición das peregrinacións xacobeas polo Camiño Norte.
O conselleiro de Innovación e Industria agradeceulle ao bispado de Mondoñedo a súa colaboración para a restauración do pazo episcopal, coa que conclúe, dixo, a iniciativa de potenciar na cidade as peregrinacións e os valores asociados á catedral que se iniciaron coa celebración dos 11 séculos do nacemento de San Rosendo conmemorados en 2007.
Fernando Blanco encadrou a actuación no pazo episcopal dentro do desenvolvemento que o seu departamento está a impulsar do Camiño Norte, no que só en 2008 a Consellería inviste 2,3 millóns de euros, un 64% máis que no ano 2006 e o 15% máis que en 2007. O conselleiro repasou as actuacións do seu departamento nesta ruta, empezando pola inauguración, antes do verán en Mondoñedo, do Centro de Interpretación do Camiño Norte, o primeiro dos oito de similares características que se localizarán en cada unha das rutas xacobeas. Os servizos do camiño están a mellorar tamén co novo albergue de Sobrado e co proxectado en Ribadeo, froito do acordo co bispado. Outras obras que destacou Blanco son a recuperación da Telleira de Boimorto e das igrexas de Santa Comba de Pías e San Lourenzo de Sasdónigas. Nesta última acaban de rematar as actuacións de rehabilitación, executadas cun orzamento de 160.000 euros.
Fernando Blanco lembrou por outra parte o apoio do seu departamento ao Concello mindoniense, que se concreta en actuacións no ámbito do turismo e en melloras na subministración eléctrica en varios núcleos do rural, na extensión das telecomunicacións wimax de banda larga mediante un convenio co concello e no apoio á dotación ao núcleo urbano do mesmo servizo a través do cabo. En total, o compromiso da Consellería de Innovación e Industria con Mondoñedo cífrase, segundo dixo Fernando Blanco, nun investimento de 2,07 millóns de euros.