RIBADEO .- O alcalde de Ribadeo, Fernando Suárez, agarda que antes do Nadal estea resolto o problema ocasionado a unhas vivendas polo desprendemento que se rexistrou hai uns días no entorno das obras que se realizan no porto comercial de Mirasol. O rexedor participou nas últimas horas nun encontro co enxeñeiro xefe da zona norte de Portos de Galicia, técnicos deste departamento e os propietarios afectados. Fernando Suárez entende que “desde Portos actúan con moi boa fe e con moi boa disposición. Estase a buscar por parte dos xeólogos e dos xefes de obra a solución técnica máis axeitada para que antes do Nadal, e agardo que así sexa, o problema estea resolto e que non vaia a máis”.
Suárez Barcia engade que “todo indica que este era un elemento que se podía mover e non se prevé que se mova nada máis afortunadamente. Agora hai que tratar de selalo, ben sexa cunha inxección de formigón ou con outra solución técnica que se está a estudar e que si pode ser para a vindeira semana se decidirá o sistema a empregar para que a empresa que acomete o resto das obras realice de xeito inmediato esta intervención. Confiamos en que así sexa. Podo dicir que o resultado dese encontro que tivemos onte foi altamente satisfactorio”.