NOTA DE PRENSA
A fórmula elixida, que cada consellería publique a súa orde de axudas segundo o tipo de dano, condena aos mariñáns a un suplicio interminable de papeleo,“…máis e máis burocracia sen garantías de obter a correspondente compensación”
BALSEIRO CUALIFICA DE INSUFICIENTES AS AXUDAS POLO TEMPORAL OUTORGADAS POLA XUNTA
* Reclama que a Xunta habilite oficinas informativas e para a tramitación das solicitudes en cada un dos concellos afectados.
* Subliña o feito de que as axudas non son en concorrencia competitiva, isto é, non se fan depender do nivel de renda e non chegarán a todo o mundo xa que unha vez esgotado o curto orzamento dispoñible, non cabe recibir a axuda malia que sexan un prexudicado.
* Balseiro insiste en que, de confirmarse que o consorcio de compensación de seguros non asume as perdas derivadas da longa interrupción do subministro eléctrico (alimentos refrixerados, lucro cesante polo peche provisional de empresas, comercios e negocios,…) a Xunta debera costear estes estragos
A Mariña, 05 de febreiro de 2008.- O dirixente do Partido Popular José Manuel Balseiro Orol cualificou como insuficientes as axudas que a Xunta está a publicar no Diario Oficial de Galicia (DOGA) co obxecto de paliar os danos provocados polo temporal. Nunha valoración provisional do contido nas distintas ordes, Balseiro Orol cuestionou a fórmula empregada polo Executivo de Touriño e de Quintana para compensar gran parte dos danos.
SUPLICIO INTERMINABLE DE PAPELEO
De xeito especial o deputado popular cuestiona que cada consellería aprobe a súa correspondente orde, dependendo do tipo de dano, condenando ás veciñas e veciños da Mariña afectados a un suplicio interminable de papeleo, a un longo camiño de burocracia e todo iso, sen garantías de que ao final poidan obter a correspondente axuda.
OFICINA DE ATENCIÓN E TRAMITACIÓN EN CADA CONCELLO
Balseiro Orol aproveitou unha vez máis para reclamar da Xunta que habilite oficinas nas que, a maiores de ofrecer a información oportuna sobre estas axudas e resolver as dúbidas que poidan xurdir aos interesados, persoal cualificado da administración autonómica poida tramitalas. Ata o momento tan só a Consellería de Innovación e Industria adoptou esta decisión máis centralizou o seu persoal nas oficinas de Burela obrigando a desprazarse ata alí aos veciños dos concellos máis afastados. Tamén ofrecen información as oficinas de extensión agraria, pero tan só naquelas localidades nas que existen. “Na nosa opinión deberan habilitarse puntos de información e tramitación en cada un dos concellos afectados, de xeito especial se como pasa no caso da axuda da consellería de Industria esta tan só pode tramitarse vía telemática”.
ATA QUE REMATEN OS FONDOS
Por outra banda e, a expensas dunha análise máis exhaustiva, o dirixente popular lamentou que as axudas non sexan en concorrencia competitiva e polo tanto, que beneficien á xente con independencia do seu nivel de renda ou da magnitude dos estragos. En todo caso, o dato máis negativo de que sexa esta a fórmula escollida é o feito de que unha vez rematado a partida orzamentaria existente para facer fronte a estes gastos, moitas daquelas persoas que sufriron danos non recibirán un só euro. O abono das axudas efectuarse polo tanto por rigoroso orde de resolución, polo que é moi importante presentar as solicitudes e a valoración dos danos a tempo, así como tamén achegar toda a documentación precisa evitando requirimentos posteriores que retrasen a resolución definitiva.
ALIMENTOS REFRIXERADOS
Balseiro Orol empraza á Xunta de Galicia a que asuma as perdas derivadas da interrupción do subministro eléctrico (alimentos refrixerados, conxeladores, lucro cesante polo peche provisional de comercios, empresas,…), de xeito especial, de confirmarse que o consorcio de compensación de seguros non cubrirá estas circunstancias. Está claro que os culpables pola tardanza en recuperar a luz eléctrica non foron os particulares, polo que é inadmisible que tanto a empresa como a Xunta se desentendan destes danos.
COMUNIDADES DE VECIÑOS
Plantexa temén o deputado popular unha serie de dúbidas, das que tamén participan moitos dos veciños da Mariña. En concreto, non comprenden como é posible que as axudas para compensar os danos producidos nas vivendas non poidan ser solicitadas directamente polas comunidades de veciños, senón que deben ser pedidas polos distintos propietarios, ainda a pesar de que moitos destes estragos afectan a elementos comúns