O BNG CONSTATOU O MALESTAR DOS VECIÑOS DE BARREIROS COS DANOS QUE A AUTOVÍA A-8 ESTÁ A CAUSAR NESTE CONCELLO E ESIXEN SOLUCIÓNS. OS NACIONALISTAS SEGUIRÁN CO TRABALLO INICIADO HAI MESES.
Barreiros, 28 de marzo de 2009. O Consello Local do BNG de Barreiros reuníuse cos colectivos veciñais e veciños afectados polas obras da autovía A-8 na sede local do BNG en San Cosme de Barreiros. Os nacionalistas tomaron esta decisión “despois de que o Partido Popular intentase boicotear a comisión de seguimento das obras da autovía. Dita comisión fora constituida a raíz dunha proposta do BNG que trasladou aos demais grupos da oposición, e conxuntamente solicitaron en pleno a súa constitución, sendo aprobada por unanimidade e participando nela todos os grupos”, lembra Xesús Díaz, concelleiro do BNG en Barreiros.
Díaz engade que “este traballo iniciado no mes de novembro, cunha primeira reunión de constitución da comisión e seguido despois co traballo de campo visitando as zonas afectadas e dialogando cos veciños para recoller as súas demandas, viuse truncado pola actitude da alcaldía que se negou a convocar as reunións das comisión cada último xoves de mes , tal como estaba preestablecido. Diante desta actitude boicoteadora do Partido Popular, e tendo en conta que as queixas veciñais continuaban, pois as súas demandas non eran atendidas, o Bloque Nacionalista Galego convocou aos colectivos veciñais, pois o compromiso do BNG é por enriba de todo cos veciños”.
Pola súa banda, Antonio Veiga, sinala que “este malestar veciñal constatouse nesta reunión, manifestando os representantes dos colectivos a súa preocupación porque o tempo vai pasando e nin desde o Concello nin desde Fomento lles garanten solucións. É de destacar a demanda presentada por veciños de San Cosme sobre o Camiño Real, que o acceso a autovía desde Pozomouro deixa cortado e incomunicadas as fincas colindantes. Tamén ven con preocupación en San Cosme as vertentes de augas que poden afectar a algunas casas”.
Os nacionalistas suliñan que “é unha demanda común de todos os colectivos que os viais municipais empregados polas empresas constructoras da autovía queden en perfecto estado ao remate das obras. Pero para iso esixen un compromiso entre o Concello, Fomento , as empresas e os veciños. Así mesmo outros colectivos coma o de Vilamar esixen indemnizacións ou compensacións para a parroquia polas molestias na ocupación dos viais (que iba ser para dous ou tres meses e xa van máis de dous anos). En tramos coma os de Celeiro de Mariñaos, as demandas sí están sendo atendidas pola empresa constructora, logo de que a Asociación de Celeiro fora a primeira en presentar as súas demandas. Iso sí, siguen reclamando que os viais, ao remate das obras queden en perfecto estado, e tamén sexa compensada a parroquia”.
Diante das demandas e situacións expostas polos veciños, o BNG acordou con eles “seguir facendo os traballos que lle correspondería realizar á comisión reventada polo PP, polo que xunto cos colectivos veciñais e afectados seguirán facendo o seguimento, o traballo de campo, e trasladando as demandas e propostas ao Concello, ás empresas, e ao Ministerio de Fomento”.