O rexedor de Ribadeo, Fernando Suárez, amósase moi satisfeito “pola acollida que tivo este curso que lles axuda nas súas relacións sociais e tamén na posibilidade de conseguir traballo entre nós” e engadiu que “seguiremos a traballar na organización de actividades para os inmigrantes”.
Desde a Oficina de Atención ao Inmigrante de Ribadeo sinalan que “o ano que ven queremos continuar con estas clases xa que desde o Concello consideramos que o coñecemento da lingua é fundamental como vehículo de integración e chave de acceso á nosa sociedade. Desta forma facilítaselles a inserción a un mercado laboral máis amplo”.
Os participantes reuníronse á mesa para clausurar este curso e fixeron unha degustación de productos típicos dos seus países.