BURELA (FNC) .- A edil de Educación, Lucía Bouza, asegura que nunca houbo tantas actividades extraescolares nos CEIP de Burela e tantas coidadoras nos seus comedores como na actualidade. Así resposta ás críticas verquidas nas últimas horas desde o PP burelés nas que aseguraban que a política de educación do Concello é nula.
A concelleira socialista sinala que “unha vez máis, como ven sendo costume, o PP de Burela critica ao goberno municipal sen aportar nada novo e, por suposto, sen recoñecer os avances que se teñen dado con grande esforzo”.
Lucía Bouza explica que “é certo que o Concello de Burela se viu obrigado a anular as axudas directas en metálico, mais isto viuse contrarrestado cun maior esforzo inversor nos dous CEIP de Burela, que viron como se lles compraban materiais cuxo custe debería asumir a Consellería de Educación, xa que o Concello só está obrigado a facer cuidados de mantemento. Aproveito tamén para lembrarlle aquí ao PP que a Consellería de Educación este último verán non cumpriu con ningunha das peticións dos colexios, como era a súa obriga”.
A responsable de Educación en Burela suliña que a súa Concellería “esforzouse duramente para que a oferta de actividades extraescolares de ambos CEIP fora maior que nunca e, de feito conseguímolo, posto que nunca as nais e os pais de Burela tiveron unha oferta tan ampla: actividades medioambientais coa Aula Gaia, inglés lúdico, expresión plástica e corporal, e outra longa relación de actividades deportivas que organiza paralelamente a Delegación de Deportes”.
Bouza engade que “o PP asume a reponsabilidade da creación dos comedores escolares, que penso que máis ben foron creados polas respectivas Asociacións de Pais e Nais dos colexios. Dí tamén o PP que comezaron a pagar as cuidadoras de comedor, cousa que penso era a súa obriga. Porén, nunca houbo tantas coidadoras como hoxe en día (nove en total), grazas tamén ao esforzo da Concellería de Educación por destinar os cartos para facilitar a vida das familias de Burela”.
A concelleira dille ao PP que “non deben pedir que os Concellos asuman os efectos dos recortes de gasto que a Consellería de Educación ven practicando dende que o PP asumiu o goberno da Xunta de Galicia, posto que eles sí que aumentaron, e moito, o gasto que as familias teñen que facer para que os seus fillos e fillas estuden no ensino obrigatorio”.