Segundo indicou o alcalde, a reunión serviu para dar a coñecer o potencial de Cervo en materia turística e empresarial ao responsable dos empresarios galegos en Madrid, “aínda que o señor Cal Pardo é bo coñecedor da zona por tratarse dun mariñao” lembrou Villares.
“O obxecto da xuntanza foi a de por as bases para provocar futuros encontros entre os empresarios galegos afincados en Madrid e os do noso termo municipal coa finalidade de crear unha auténtica vinculación entre eles e establecer intercambios comerciais que permitan impulsar a creación de empresas conxuntas ou mixtas e intercambiar información sobre mercados” indicou o alcalde. Neste senso lembrou que un dos obxectivos do Goberno Municipal é reactivar a economía do concello “e penso que este tipo de entrevistas son moi beneficiosas para artellar entre todos os sectores implicados unha estratexia conxunta que nos permita reactivar a parálise empresarial que están a padecer actualmente os concellos coma o de Cervo” asegurou.
Aegama ten na actualidade máis de 400 asociados, moitos deles vinculados ao sector da hostalería e restauración, sector esencial para o desenvolvemento turístico. Entre os seus fins atópase a promoción comercial e difusión dos produtos e servizos do empresariado galego; o fomento da solidariedade das empresas, empresarios e profesionais de Galicia; o intercambio de información entre os seus membros; a potenciación dos contactos empresariais e do perfeccionamento das técnicas de xestión empresarial entre os seus asociados; e coadxuvar ao desenvolvemento económico, cultural e científico de Galicia.