Nota de Prensa
Un ascensor para o Salón de Actos
O BNG denunciara esta situación despois de que o equipo de goberno xovense acordara derrubar a rampla do Salón de Actos do Centro Cívico sen habilitar antes un novo acceso para os usuarios. Marco López mostrouse colaborador e quixo poñer o seu grao de area para que as cousas se fagan “con sentidiño”.
O responsábel local do Bloque en Xove asegurou unha vez máis poñerse a disposición do alcalde para axilizar tamén este asunto e que “non adiemos outros sete meses o comezo da obra” tras o erro cometido no verán polo executivo local, xa que o problema de accesibilidade e seguridade non pode agardar máis.
López declarou a súa vontade de rematar con esta condena inxusta para os cidadáns que non poden acceder con liberdade a un edificio tan demandado coma o Salón de Actos, e falou de exemplos concretos, como o de que houbo pícaros este Nadal que non viron os Reis Magos “ao non poderen seus pais subir o carriño”.
Marco López insistiu en que a Administración Local debería ter unha sensibilidade meirande na erradicación das barreiras arquitectónicas que forman parte desde hai anos do mobiliario urbano e rural do Concello, e que é obriga dun bo goberno non crear barreiras coa obra nova.