Cao lembrou algunhas das decisións que debeu adoptar ao longo deste tempo, “a máis complicada foi a de amosar o noso total rexeitamento a instalar as nosas tendas, as tendas dos nosos asociados, no Eroski en Vilar. Son dúas formas de entender o comercio que pensamos que non son compatibles e nalgún caso quedou demostrado que estas áreas supuxeron o desmantelamento do tecido industrial naquelas vilas nas que se implantaron”. Outra das decisións ás que fixo alusión foi á creación do Centro Comercial Aberto de Ribadeo que “está totalmente consolidado e que supuxo a humanización dun entorno estratéxico para a nosa vila”.
O presidente de ACISA/CCA sinalou que “en moitos momentos se sentiu frustrado pola falla de implicación dos políticos en todo este proxecto e polas actitudes frívolas dos sucesivos gobernos diante do desarrollo dun pobo”. Gervasio Cao manifestou que “aínda estamos sin PXOM, sin PEPRI e sin saber que pasará con ese aparcamento que tanto necesitamos en Ribadeo”. Tamén aludiu ao porto e asegurou que “Ence está perdida para Ribadeo, porque apostou por outra solución que lle garantiza a entrada de madeira para cubrir as súas necesidades en caso de que a oferta galega non lle sexa suficiente”. O presidente dos comerciantes falou do polígono industrial, “outro exemplo máis dos devaneos políticos, un parque empresarial que ten un grao de éxito bastante limitado a estas alturas pola situación económica que se está a vivir”.
Gervasio Cao tamén se referiu no seu balance á praia das Catedrais “non se pode andar a medias tintas, hai unha falla de información tremenda sobre este areal e moitísima xente se marcha sen coñecer a súa verdadeira dimensión… Toda esta sucesión de cousas que veño de enumerar o que supoñen é un lastre para que Ribadeo acade as cotas de desenvolvemento que lle corresponden e que historicamente sempre tivo tanto na Mariña de Lugo como no Occidente asturiano”. O presidente de ACISA/CCA tamén criticou “aos que deixaron lista unha ordenanza para meter en cintura aos hostaleiros e agora desde a oposición pretenden o contrario e que o subdelegado do Goberno dea carta libre para que cada un abra e peche cando lle dea a gana”.
Cao insistiu na necesidade de que “Ribadeo conte con PXOM e co PEPRI e pediulle a José Carlos Rodríguez Andina que traballe nesa liña para conseguilo, é unha persoa con experiencia e debería desde a oposición traballar nesta liña e tentar acabar con ese intercambio de cromos no que están inmersos o actual alcalde cos voceiros do PSOE e de UPRI no tema das alegacións… tú me das aquí, yo te doy allí… levamos tres anos intercambiando cromos, hai que acabar con esto e a persoa que penso que podería aportar algo é agora mesmo José Carlos Rodríguez Andina, non por cargo, senón que pola súa experiencia podería desbloquear ou desatascar esta situación. Sería bó que se intente dar solución ao problema do aparcamento que é un compromiso firme dos partidos que estaban no Concello e que se fai moi necesario”.
Tamén tivo palabras de lembranza para Andrés Tojal que “traballou comigo ata hai dous anos e quero ter para el un recordo especial”. Gervasio Cao anunciou que o vindeiro 30 de abril Tojal será recoñecido como autónomo de honor polo traballo desenvolvido ao longo da súa vida profesional e como autónomo do ano foi elexido Juan Edrosa, “un xoven que está a facer cousas interesantes en Ribadeo en diferentes ámbitos”.
Finalmente Cao animou aos comerciantes a seguiren unidos porque “só con unión se superan os momentos difíciles e tamén coa implicación de todos”. Ofrecéulle a súa colaboración á nova directiva e desexóulle moitos éxitos.