Nota de Prensa
Os populares negocian co organismo autonómico despois de ter falado co Presidente da asociación de comerciantes, co Club Náutico e co Patrón maior da Cofradia de Pescadores de Foz
O PP XESTIONA ANTE PORTOS O DRAGADO DO CANAL DO PEIRAO, DA DÁRSENA E DO PORTO CHICO
* Os pesqueiros vense obrigados a esperar a preamar para acceder ao porto, situación que tamén afecta ás embarcacións recreativas
Foz, 4 de xuño de 2010.- O Partido Popular de Foz, a través do seu portavoz, Pedro Fernández Manín, está a xestionar ante o Ente Público Autonómico Portos de Galicia o dragado do canal do peirao, da dársena e do acceso ás instalacións coñecidas como Porto Chico.
Os populares focenses realizan esta xestión para achegar o investimento necesario para esta actuación e algúns trocos na dársena para aumentar as prazas de embarcacións deportivas despois de ter falado co Presidente da asociación de comerciantes locais, con representantes do Club Náutico e co Patrón Maior da Cofradía de Pescadores de Foz, que lle deron conta da importancia de desenvolver estes traballos
Segundo as informacións que manexan desde o PP, neste momento os sedimentos diminuíron a profundidade do acceso ás instalacións portuarias de tal xeito que os pesqueiros se ven obrigados a esperar a preamar para acceder ao porto, situación que tamén afecta ás embarcacións recreativas
As operacións de dragado do canal, da dársena e do acceso ás instalación coñecidas como Porto Chico servirán para conseguir un maior calado e máis seguridade para as embarcacións e os usuarios das instalacións marítimo pesqueiras.