Nota de Prensa
ANTONIO VEIGA PARTICIPOU NA ENTREGA DE TROFEOS NA FINAL DA LIGA DE FÚTBOL SALA E DO IV CAMPIONATO GALEGO “TODOS POLO FÚTBOL”
O campionato, cuxa primeira copa foi para os xogadores do Lenda, é promovido pola Federación de Asociacións de Enfermos mentais (FEAFES) e celebrouse no pavillón Vista Alegre de Burela
A campioa da liga do grupo norte foi a asociación Apem Cee, e a subcampioa a Apem Coruña. No grupo sur, resultou gañadora a Lenda e subcampioa a asociación Lar
Burela, 02 de xullo de 2010. O delegado de Deporte da Deputación, o nacionalista Antonio Veiga, participou esta tarde na entrega de trofeos na xornada final da liga de fútbol sala, durante a cuarta edición do campionato galego “Todos polo fútbol”, que promove a Federación de Asociacións de Enfermos Mentais (FEAFES). A esta xornada final tamén asistiron Neves Cando, concelleira de Cultura de Burela, o presidente de FEAFES, José Ramón Girón, o directivo do CD Burela FS Marcelino Luna, a concelleira de Sanidade, Sonia Fraga e o alcalde de Burela, Alfredo Llano, entre outros.
O campión da liga do grupo norte foi o Apem Cee, e o subcampión o Apem Coruña. No grupo sur, resultou campión o Lenda e subcampión o Lar. En canto ao campionato “Todos polo Fútbol”, a primeira copa foi para a asociación Lenda e a segunda para a asociación Apem Coruña.
Neste campionato participaron, ademais da asociación de Axuda ao Enfermo Mental A Mariña, Apem Coruña, Apem Carballo, Apem Cee, Apem Cambre, Porta Nova (Narón), Alba (Pontevedra), Doa (Vigo), Lar (Vilagarcía de Arousa), Morea (O Barco) e Lenda (Redondela). Este ano, o campionato celebrouse no pavillón do Vista Alegre de Burela e foi apoiado pola Área de Deporte da Deputación, e polo C.D. Burela F.S. e o concello burelao. O pavillón Vista Alegre acolleu a cita desde as 11 horas desta mañá ata as 19 horas da tarde, cando se celebrou o partido do que finalmente se erixiu en gañador do campionato.
O obxectivo deste encontro deportivo non é outro que promover a participación social do colectivo de enfermos mentais a través do deporte, que xoga o papel de instrumento integrador e de sensibilización social. Pretende fomentar a participación das persoas con enfermidade mental e dos seus familiares en eventos deportivos e competicións, loitando así contra o estigma social, e ademais trata de instrumentalizar o deporte como ferramenta de traballo para as persoas que necesitan dunha mellora do estado físico e mental, á vez que disfrutan do tempo de lecer e fomentan as relacións con outras persoas.