FONTE: Europa Press
Tras envorcar un camión
Normalidade na N-634 en Barreiros (Lugo) tras o verquido de alcatrán
LUGO, 10 Ago. (EUROPA PRESS) –
O camión cargado de alcatrán que na mañá deste martes envorcou na estrada N-634 foi retirado e a calzada limpada, polo que se restableceu a normalidade, segundo informaron fontes do 112 a Europa Press.
O servizo de emerxencias indicou que pasadas as 14.00 horas o camión foi retirado e a estrada quedou limpa uns minutos antes das 16.00 horas, segundo confirmou Protección Civil de Barreiros.
Unicamente queda pendente que a empresa propietaria da substancia retire o alcatrán acumulado nunha foxa habilitada para conter a vertedura, segundo precisaron as mesmas fontes.
O incidente tivo lugar sobre as 10.40 horas no quilómetro 570 da estrada N-634 ao seu paso por Barreiros ao envorcar un camión cunhas 25 toneladas de alcatrán no carril dereito da calzada á altura da rotonda da Cruz do Lobo.
Foron mobilizados a Garda Civil de Tráfico; o Grumir de Barreiros e os das localidades lucenses de Ribadeo e Cervo; así como o 061; e a Consellería de Medio Ambiente, Territorio e Infraestruturas.
A carga do camión verqueuse por unha parte sobre a calzada e, por outra, cara a unha cuneta, lugar onde realizaron efectivos do Grumir unha foxa para recoller o alcatrán, polo que as autoridades indicaron que “non hai risco” de contaminación xa que, ademais, na zona non hai regatos nin ríos.