Unha trintena de nenos disfrutaron da ocioteca da delegación de Benestar Social do concello de Burela

Nota de Prensa

PRETO DUNHA TREINTENA DE NENOS DISFRUTARON DA OCIOTECA DE VERÁN QUE PUXO EN MARCHA POR SEGUNDO ANO CONSECUTIVO A DELEGACIÓN DE BENESTAR SOCIAL DE BURELA.

Burela, 9 de setembro de 2010. Preto dunha treintena de nenos con idades comprendidas entre os 3 e os 8 anos participaron na ocioteca que puxo en marcha por segundo ano consecutivo a Delegación de Benestar Social de Burela. Onte tivo lugar a clausura.

A responsable de Benestar Social, Neves Cando, lembrou que “a ocioteca púxose en marcha por segundo ano consecutivo para facer posible a conciliación da vida laboral e familiar e ofrecer unha actividade lúdico-formativa para os nenos durante o verán. Os cativos de entre 3 e 8 anos participaron en programas relacionados coa coeducación, o medio ambiente, a expresión plástica e a lectura. Foron un total de 28 nenos e nenas os que disfrutaron desde principios de xullo e ata onte mesmo destas actividades que se desenvolveron na Casa da Xuventude en horario de 9 a 14 horas”.

Envellecemento saudable

Por outra banda, a edil nacionalista anunciou que “hoxe reanudamos o programa de Envellecemento saudable dirixido aos nosos maiores que se ven desenvolvendo desde o mes de maio. Hoxe tócalle o turno á saúde e á calidade de vida, á necesidade de durmir ben, de facer exercizo e dunha vida medianamente relaxada. A charla será ás cinco da tarde na residencia de maiores de Burela”.