Nota de prensa
A Deputación abre o mércores o prazo para solicitar as obras do Plan de Comunidades Veciñais de 2011, dotado con 2,3 M€
– A Xunta de Goberno aprobou o modelo de solicitude, logo de que o Pleno dese o visto e prace ás bases da iniciativa coa que en 2010 se subvencionaron preto de 300 actuacións
– A Deputación adianta en 2 meses a posta en marcha desta iniciativa, “porque se trata dun bo modelo para axudar ós Concellos nestes momentos nos que teñen tantos problemas de liquidez”
– Tan só unha semana despois da aprobación das obras, a Deputación inicia a contratación do Plan Complementario de 9,5 millóns de euros, destinado a intensificar o apoio ós municipios máis poboados ou exercen como motores comarcais
O organismo provincial mantén en 2011 o presuposto do Plan, 2,3 millóns de euros, o que supón algo máis do 65% do investimento total das obras. As axudas que concede a Deputación para calquera das actuacións non supera os 12.000 euros, é dicir, o 75% do importe total da obra. O 25% restante é aportado polos colectivos veciñais. Esta iniciativa súmase a outras que o organismo provincial puxo en marcha como o Plan de Pequenas Infraestruturas para Concellos de menos de 5.000 habitantes do que en 2010 se beneficiaron 41 nunicipios.
En 2010 concedéronse 298 subvencións. O 65% están tramitadas ou en tramitación. Polo que respecta a 2009, o Plan estivo dotado con 100.000 euros menos, e subvencionáronse 295. Neste caso, están tramitadas o 94% das mesmas. Asimesmo, as de 2008, un total de 291, están rematadas o 100%. O Plan de Comunidades Veciñais mellora as economías locais, xa que se subvencionan pequenas obras que os Concellos non poderían acometer sen a colaboración da Deputación, como por exemplo: pequenos abastecementos de auga, saneamentos e pavimentacións, rede de sumidoiros, alumeado público ou acondicionamento de camiños rurais.
Arranca a contración do Plan Complementario
A Deputación iniciou hoxe a contratación das obras do Plan Complementario que se executarán nos 9 Concellos que se benefician desta iniciativa destinada a intensificar o apoio ós municipios máis poboados ou exercen como motores comarcais, ó tempo que quedaran excluídos doutros plans provinciais como o de Pequenas Infraestruturas para Concellos ou o canon hidroeléctrico. Concretamente, aprobouse a contratación do campo de fútbol de Foz por valor de 450.000 euros. “Tan só unha semana máis tarde de aprobar as preto de 70 obras xa iniciamos a súa contratación”.
Ademais desta actuación, executaranse outras 7 neste municipio da Mariña que, en total, suman 1 millón de euros. Son as seguintes: redacción de proxecto para residencia de 100 prazas con centro de día incorporado; reforma da escola de Forxán; soterramento de contedores; acondicionamento de salas exposicións e cafetería do Cenima e instalación de “spa” na piscina municipal; equipamento e infraestruturas de servizos básicos e mellora na rede viaria municipal mediante aglomerado; adecuación do parque infantil na rúa Congostra e do parque da Praza Conde de Fontao; subministro de bombas para impulsión de residuais nas parroquias de Fazouro e Cangas, e execución das arquetas de bombeo na Pontevella, tamén en Fazouro.
Máis cooperación cos Concellos
A Xunta de Goberno deu o visto e prace a 5 convenios, a través dos que se subvenciona con 193.501 euros a execución de novas obras noutros tantos Concellos da provincia con 193.501 euros. Trátase da construción dunha nave-almacén en Negueira de Muñiz (24.530 euros); abastecemento de auga a Luaces e a Arco de Frades, en Pol (34.468 e 54.300 euros respectivamente); mellora de varias pistas municipais en Pantón (40.000 euros) e recuperación do contorno da ponte do Pasatempo en Mondoñedo (40.203 euros).
Tamén se aprobou o convenio da subvención de 21.365 euros para o financiamento dos gastos de persoal vinculado coa atención dos residentes do Fogar Español de Montevideo. Esta actuación enmárcase dentro do compromiso asumido polo Presidente en setembro de 2009 na viaxe realizada a Sudamérica.