Días atrás nunha mostra evidente de torpeza argumental, falta de visión política e notorio desprezo pola verdade, o único concelleiro nacionalista local, acusaba a este deputado e ao Partido Popular de non ter aportado nada ao concello de Cervo ao longo dos últimos anos. Sorprende de xeito destacado esta acusación, sobre todo tendo en conta de onde vén, é dicir, dos mesmos que, cando conxuntamente co PSOE gobernaban a Xunta de Galicia e hoxe aínda o están facer na Deputación, tiñan e teñen instruccións expresas de boicotear toda obra, proxecto ou servizo, que puidera redundar en beneficio dos veciños de Cervo.
Pero as críticas do BNG resultan sorprendentes tamén, porque non fai falla ser un experto seguidor da actualidade municipal para darse conta do moito que se ten acadado despois do acceso do Partido Popular á responsabilidade de goberno na Xunta de Galicia, despois de que rematara o tempo no que Cervo estaba desaparecido do mapa dos investimentos tanto para a Xunta bipartita como para, aínda hoxe, a Deputación, por decisión expresa do PSOE e dos dirixentes do BNG local.
Hoxe son froito da dedicación e do empeño do Goberno local, do seu alcalde e deste deputado que vos fala, e do compromiso do Partido Popular cos veciños de Cervo, entre outras, o investimento para a urbanización e recuperación da praza dos Campos, as obras da Residencia con centro de día xa en execución- ou o acordo que se materializa no apoio da Xunta de Galicia á cerámica de Sargadelos e que permite a continuidade dun proxecto industrial e cultural de enorme magnitude así como o mantemento de máis dun cento de postos de traballo. Tres exemplos de especial relevancia que contrastan coa escasa ou nula actuación do bipartito en beneficio deste concello.
Invitámoslles, emprazámoslles a que poñan sobre a mesa as obras, actuacións ou proxectos executados ao longo dos catro anos de bipartito na Xunta ou que nos digan que teñen feito en San Ciprián, onde incluso están a boicotear alto tan importante como é a ampliación do Museo do Mar. Os dous máximos dirixentes da oposición en Cervo están a soldo da Deputación e lonxe de buscar un beneficio para os seus veciños, desprezan, paralizan e nada teñen achegado para Cervo, nun acto evidente de discriminación, falta de compromiso e traizón daqueles que parecen ter esquecido que no seu día prometeron servir a Cervo.
Ben é certo que un proxecto como o da construción da goleta con ser un revulsivo turístico, laboral e cultural para o sector artesanal da carpintería de ribeira ten que ser atrasado no tempo ata que as circunstancias sexan mellores. Con todo Cervo seguirá ganando. Ganará co proxecto alternativo á construción da goleta e ganará coa creación do porto deportivo. Estas novas instalacións náuticas non serían realidade co bipartito xa que PSOE e BNG decidiron de xeito expreso excluír a Cervo do plan director de portos deportivos o que supoñía que, como mínimo ata 2020, data final de vixencia deste plan, non poderían iniciarse os trámites para a súa construción. Unha decisión inxusta que o Goberno do PP vén de rectificar. Está claro que hai dúas formas de gobernar, está claro, a daqueles que asfixian ao concello, sen importarlles que actúen en contra dos seus veciños, e a do PP que desde a sintonía co goberno da Xunta está a traballar arreo por este concello e polo conxunto das e dos cervenses.
Jose Manuel Balseiro Orol