Nota de prensa
ANTONIO VEIGA VISITOU O CAMPO DE FÚTBOL 7 ARTIFICIAL DO VALADOURO
O delegado de Deportes da Deputación comprobou o perfecto estado do campo de fútbol 7 artificial que permitirá aos equipos do Valadouro adestrar en boas condicións durante todo o ano
Esta infraestrutura realizouse cun investimento de 130.000 euros dos que a Deputación de Lugo aportou 80.000 euros
O VALADOURO, 25 de marzo de 2011. O delegado da Área de Deporte da Deputación, Antonio Veiga, xunto ao alcalde do Concello do Valadouro, Euloxio Fernández Sampayo, os membros do BNG do Valadouro, Ramón Rouco Fernández e Eduardo Chao entre outros representantes da corporación municipal, así como os membros da directiva do club de fútbol do Valadouro e representantes da empresa que realizou as obras, comprobaron esta tarde o perfecto estado no que quedou o campo de fútbol 7 de herba artificial do Valadouro. Esta infraestrutura, para a que se investiron un total de 130.000 euros dos que a Área de Deportes da Deputación de Lugo aportou 80.000 euros e a parte restante o propio Concello, consistiu na creación dun campo de fútbol-7 no recinto deportivo do Árbol, situado nas inmediacións do futuro polígono industrial da vila.
Tal e como salientou Antonio Veiga, “grazas ao compromiso da Deputación de Lugo, a través da Área de Deporte, subvencionouse con 80.000 euros máis do 60% do importe das obras de acondicionamento do espazo deportivo que ascenden a 130.000 euros”. A parte restante, un total de 50.000 euros, correron a cargo do concello mariñao. Logo disto, o nacionalista resaltou que a instalación deste campo de fútbol-7 responde ás demandas expostas en varias ocasións pola Sociedade Deportiva Valadouro e o propio concello en prol da creación dun novo campo que lle permitise ao club dispor dun lugar no que realizar os seus adestramentos ao longo de todo o ano en óptimas condicións, sen necesidade dun mantemento moi exhaustivo e que soportase un uso intensivo.
Tal e como comentou o delegado da Área de Cultura e Deporte este proxecto enmárcase na liña de colaboración aberta con todos os concellos das distintas comarcas para dotar ou mellorar as instalacións deportivas existentes ao longo da xeografía lucense.