Nota de prensa:
O CONCELLO IMPARTIRÁ CURSIÑOS PARA ACHEGAR A ADMINISTRACIÓN ELECTRÓNICA AOS CIDADÁNS. ALFREDO LLANO SUBLIÑOU QUE NA PÁXINA WEB HABERÁ TAMÉN UN ENLACE PARA QUE AS ASOCIACIÓNS VECIÑAIS COÑEZAN AS SUBVENCIÓNS QUE CONVOCAN AS DIFERENTES ADMINISTRACIÓNS.
Burela, 4 de abril de 2011. O Concello impartirá cursiños para achegar a administración electrónica aos cidadáns. O alcalde, Alfredo Llano, subliñou que na páxina web do Concello haberá tamén un enlace para que as asociacións do municipio coñezan as subvencións ou axudas que convocan as diferentes administracións.
O rexedor asegurou que “estamos rematando o novo portal web do noso Concello, estamos traballando a diario para que se concrete o antes posible. A administración electrónica implantada en Burela permitirá aos veciños a través de internet facer moitos trámites desde as súas casas favorecendo a xestión fácil de moitos procesos. Será unha cuestión mi valorada e moi boa”.
Llano sinalou que “vamos facer dous cousas, por un lado e en canto teñamos moi próxima a apertura deste servizo faremos uns cursiños durante dous ou tres días, posiblemente habilitemos unha aula que pode ser no centro de formación do Concello, para que todos os veciños que teñan interés en saber cómo funciona a administración electrónica poidan facelo. Queremos que se acheguen a estes novos medios que poñemos ao seu alcance desde o noso Concello”. E engadiu que “por outro lado, atendendo ás demandas das asociacións de Burela, vamos abrir un enlace onde poidan coñecer os tipos de subvencións ou de axudas que van xurdindo desde as diferentes administracións. Cando apareza algo da Xunta, da Deputación ou do propio Concello poderán acceder e así baixar e descargar os documentos para solicitar esas axudas. Ás veces poden pasar prazos ou desapercibidas algún tipo de axudas, a través deste servizo que vai poñer en funcionamento o Concello de Burela agardo que sexa de moita utilidade e sirva para aproveitar todo aquelo que lles interese ás asociacións e agrupacións de Burela”.
Acceso ao porto
O alcalde de Burela confirmou que o vindeiro 13 de abril ás 20 horas terá lugar a xuntanza cos veciños afectados polo cambio de trazado das obras de acceso ao porto. Alfredo Llano lembrou que “segue a exposición pública unha copia dese proxecto, xa estiveron pasando por aquí todos aqueles veciños que teñen interés en saber cómo quedará ese trazado e cómo lles afectará ás súas fincas”. O rexedor convidou “á xente que non sabe aínda que está aquí ese documento a que veña e o consulte e o mércores da vindeira semana faremos unha xuntanza no salón de plenos para todos os veciños que queiran acudir e saber un pouco como queda ese trazado”. Llano está en contacto coa Xunta para que sexan técnicos de Medio Ambiente e Infraestructuras os que xunto aos técnicos municipais resposten ás preguntas que lles poidan formular os veciños de Burela.