A Deputación homenaxeou a Christian e Renato, infantís do Burela FS campións de España coa selección
Nota de prensa
A DEPUTACIÓN HOMENAXEA A CHRISTIAN E RENATO COMO CAMPIÓNS DE ESPAÑA
Antonio Veiga tamén se reuniu co presidente da entidade laranxa, José Ramón González Casas, para asinar o convenio de colaboración entre a Deputación de Lugo e o club burelista, destinado a cubrir gastos da tempada 2010-11, con especial incidencia na promoción do deporte de base. Neste acto tamén estiveron a concelleira de Deporte de Burela, Neves Cando, e o director xeral do club, José Luis Sáez.
O responsable de Deporte da Deputación destacou o CD Burela FS como exemplo de canteira: “O seu traballo polo deporte de base na Mariña é continuo, tanto por éxitos acadados como por actividades que realiza de fomento do deporte a todos os niveis. Non só forma xogadores para o propio club, senón tamén para as seleccións, como quedou reflectivo na participación de Christian e Renato con Galicia Infantil”. “Dende a Deputación sentímonos orgullosos do traballo de fondo e seriedade deste club” puntualizou Antonio Veiga.
Pola súa banda José Ramón González e José Luis Sáez agradeceron a axuda prestada pola deputación e o compromiso demostrado co proxecto laranxa, a pesar dos tempos de crise.