A DELEGACIÓN TERRITORIAL DA XUNTA DISPÓN XA DUN SERVIZO DE VIDEOINTERPRETACIÓN QUE FACILITARÁ A TRAMITACIÓN ÁS MÁIS DE 2.200 PERSOAS XORDAS DA PROVINCIA DE LUGO
Raquel Arias presentou esta nova prestación, que é unha das achegas tecnolóxicas ao Plan de Acción Integral para as Persoas con Discapacidade de Galicia 2010-2013 que está a implantar a Secretaría Xeral de Modernización e Innovación Tecnolóxica
Trátase dunha iniciativa pioneira en España que está a impulsar a Confederación Estatal de Persoas Sordas para eliminar as barreiras de comunicación entre persoas xordas e persoas oíntes
Con este novo sistema poderanse beneficiar 897 persoas con discapacidade auditiva na propia cidade lucense
Lugo, 19 de xullo de 2011.- A Xunta de Galicia, a través da Secretaría Xeral de Modernización e Innovación Tecnolóxica, acaba de por en marcha na zona de Rexistro e Información do Edificio Administrativo de Lugo un sistema de videointerpretación en lingua de signos para persoas xordas, ademais de poder acceder tamén a través do portal corporativo.
Tal e como explicou o delegado territorial, Raquel Arias, “este servizo, que permite acceder á mesma información que se facilita a través do teléfono 012, xa se puxo en marcha no Rexistro Xeral de San Caetano nos últimos meses e, agora, se está a poñer en marcha nas delegacións territoriais da Administración autonómica”.
Deste xeito, Arias, e o secretario xeral da Federación de Persoas Xordas de Galicia (FAXPG), Iker Sertucha, foron os encargados de presentar este sistema no Rexistro da Xunta en Lugo nun acto no que tamén estivo presente a presidenta da Asociación de Personas Sordas de Lugo (Asorlu), Purificación López.
Galicia é a segunda Comunidade Autónoma que ofrece o servizo de videointerpretación en lingua de signos para persoas con algunha discapacidade auditiva. É unha iniciativa que está a desenvolver a Confederación Estatal de Personas Sordas (á que está asociada a FAXPG) a través da plataforma SVisual. En Galicia o servizo ponse en marcha grazas ao convenio asinado o pasado mes de febreiro entre a Federación de Asociacións de Persoas Xordas de Galicia (FAXPG) e a Secretaría Xeral de Modernización.
Acceso presencial e vía web
Deste xeito, con este novo servizo, as persoas con algunha discapacidade auditiva teñen a súa disposición un videoteléfono instalado no Rexistro Xeral da Delegación Territorial. A través deste dispositivo poderán poñerse en contacto co servizo de videointerpretación da FAXPG dende onde se facilitará a interpretación da lingua oral a lingua de signos entre o empregado do Rexistro e a persoa xorda.
Ademais, as persoas con discapacidade auditiva poden empregar a videointerpretación a través da web da Xunta. Neste caso, o usuario precisa dun ordenador con webcam e un teléfono co que contactará co servizo de videointerpretación indicando a persoa, entidade ou servizo co que desexa facer a súa consulta. Utilizando unha liña paralela, o videointérprete contactará co destinatario e lle indicará que se vai a establecer a comunicación. A partir dese momento o videointérprete actuará de ponte entre a lingua de signos e a lingua oral, permitindo así a comunicación entre a persoa xorda e a persoa oínte.
Beneficiarios
Así, a delegada territorial resaltou que con este novo sistema de videointerpretación poderanse ver beneficiadas ás 2.218 persoas con discapacidade auditiva na provincia de Lugo, segundo datos da Federación de Asociacións de Persoas Xordas de Galicia (FAPXG), cifra que na cidade amurallada ascende a 897.
Con todo, Raquel Arias destacou o feito de contar cun novo servizo na Delegación Territorial da Xunta en Lugo para “achegarse aínda máis aos cidadáns” co único obxectivo de “facilitar a relación co administrado”, neste caso, “coas persoas con algún tipo de discapacidade auditiva”.
Plan de Acción para Persoas con Discapacidade
O sistema de videointerpretación para as persoas con discapacidade auditiva é unha das achegas da Secretaria Xeral de Modernización e Innovación Tecnolóxica ao Plan de Acción Integral para as Persoas con Discapacidade de Galicia 2010-2013. Así o salientou a delegada territorial da Xunta, quen destacou que un dos obxectivos prioritarios do plan é a eliminación de todo tipo de barreiras para converter Galicia “nunha sociedade accesible a todos os niveis”.
Explicou que neste proxecto recóllese específicamente a importancia da investigación, estudo e posta en marcha de novas ferramentas que aproveiten as novas tecnoloxías ao servizo da accesibilidade e da mellora das condicións de vida das persoas con discapacidade.
Pola súa banda, o secretario xeral da Federación de Persoas Xordas de Galicia, Iker Sertucha, destacou que o proxecto SVIsual é unha iniciativa pioneira en España que busca “eliminar as barreiras de comunicación existentes entre persoas xordas e persoas oíntes.”
Neste sentido, o secretario xeral da FPXG indicou que “tanto as persoas oíntes como as persoas xordas na súa diversidade poderán usar SVIsual a través da lingua de signos española ou calquera outra modalidade comunicativa que soliciten en función das súas necesidades grazas aos servizos de signo e voz ou mensaxería instantánea, que contribúen a ofrecer un servizo personalizado.”