Por unha banda, critica as medidas tomadas polo Goberno de España, avaladas pola Unión Europea e por todos os organismos internacionais, así como consideradas totalmente necesarias para superar a crise e conseguir que a nosa economía poidese medrar. É certo que non agradan a ninguén e menos a nós, os socialistas, pero a diferencia doutros políticos, si temos un concepto de país, sen necesidade de ir enarbolando a bandeira en calquera acto. Pensamos ante todo nas persoas, pois fomos elixidos para gobernar con sensatez e eficacia en nome de todas elas.
Pero debo recoñecer que ten toda a razón ó afirmar que hai dous modelos distintos de xestión: o que está a practicar o PSOE, tomando medidas que nos axuden a paliar a situación de crise e a saír adiante, e o estilo de Feijóo, o dun goberno que se engrandece ó falar de austeridade, cando en realidade o que practican é a política dos recortes en servizos de primeira necesidade. Presumen de aforro a costa das familias e de todos os traballadores.
A política austera da que se enorgullece o Goberno Galego, baseáse na supresión de prestacións en servizos esenciais, como son a educación, a sanidade e o emprego. Pero por se o señor Balseiro non se lembra dos recortes do seu goberno, podemos poñer enriba da mesa algunhas das últimas medidas tomadas polo equipo de Feijóo.
Non só se recortaron os presupostos, senón que paralizaron inversións e actuacións do anterior goberno, entre as que se atopaba a ampliación do Hospital da Costa, co que se conseguiría ofrecer novos servizos e reducir as longas esperas que a día de hoxe seguimos soportando. Como non o quixeron facer así, as listas seguen sendo insoportables e os máis de 72.000 mariñanos que acuden a este hospital teñen que ser trasladados, en moitas ocasións, a outros centros para recibir unha atención médica especializada, intervencións cirúrxicas e outras probas de diagnóstico. E ademáis de non mellorar, en lugar de manter o conseguido aínda o empeoraron, reducindo as peonadas dos profesionais e privatizando a construcción e a consecuente xestión dos novos hospitais.
O señor Balseiro fala de que unha das prioridades do seu partido e do goberno do que forma parte é a sustentabilidade da sanidade e a mellora da súa calidade, ¿cren vostedes que os feitos avalan as súas palabras?
Todos os recortes que levan adiante non só se reflexan en sanidade, a educación é outra das dianas ás que apuntan sen sentido. Non só eliminaron a gratuidade dos libros de texto, senón que están suprimindo as prestacións a pasos axigantados, todo o que se conseguiu mellorar no goberno anterior volve atrás por culpa da falta de rigor e ineptitude do equipo actual. Deron peche a 19 escolas rurais, seguiron, reducindo nun 50% o presuposto do programa Preescolar na casa, un servizo punteiro a nivel europeo para o que recortaron máis de 300.000 euros, perxudicando a unhas 1.200 familias e a uns 35 traballadores e rematan agora coa supresión de 67 centros de infantil e primaria e 14 escolas unitarias, o que suporá a perda de 200 postos de traballo.
Pero as consecuencias en materia de emprego non lles importan, neste tema a desidia é absoluta. Dan por feito que as súas competencias son asumidas por outras institucións, como a Deputación de Lugo, que está facendo un gran esforzo inversor para reducir o desemprego en toda a provincia. Os Concellos ven que a reacción da Xunta se fai esperar e moitos alcaldes, incluso do Partido Popular, vense obrigados a recurrir ó organismo provincial para poñer en marcha plans de emprego que lles axuden a activar a economía dos seus municipios.
Á hora de poñer en marcha unha política de aforro, hai moitas máis medidas que tomar antes de recortar en sanidade e educación, servizos básicos para a cidadanía. Balseiro e o Partido Popular demostran, unha vez máis, que unha das súas prioridades é fixarse nos demais e non tratar de solucionar os erros propios. Aparecen día a día nos medios confundindo ás persoas con datos malinterpretados e engrandecidos, transmitindo só a realidade que lles convén. Non se pode defender o indefendible.
José Ramón Val Alonso
Deputado Provincial do PSOE