Clausuraron a liga de tenis feminina e a escola de verán do club Marzán de tenis de Foz

Nota de prensa

ANTONIO VEIGA PARTICIPOU NA CLAUSURA DA LIGA DE TENIS FEMININO E A ESCOLA DE VERÁN DO CLUB MARZÁN DE FOZ

Estas actividades implicaron no deporte a moitas rapazas e mulleres ao longo de todo o verán

FOZ, 11 de setembro de 2011. O vicepresidente da Deputación, o nacionalista Antonio Veiga, participou esta mañá na clausura da liga de tenis feminina e da escola de verán do club Marzán de tenis de Foz.

Esta actividade reuniu ao longo de todo o verán a moitas deportistas que se achegaron até as pistas de tenis do club de Marzán para practicar tenis. Desta maneira desenvolveuse a escola de verán, onde persoas do club e outras puideron acceder a xogar ao tenis e adestrar mellorando a súa técnica, maila liga feminina de tenis, que contou cunha organización competitiva para rematar, no día de hoxe, premiando ás vencedoras.

A Área de Benestar Social e Deporte da Deputación de Lugo, que dirixe o nacionalista Antonio Veiga, apoia economicamente a posta en marcha destas actividades deportivas do Club de Tenis de Marzán, que implican a un grande número de persoas na práctica deportiva tendo ademais, como no caso das actividades que se clausuran hoxe, especial importancia ao tratarse de actividades que promoven a inserción da muller no deporte.