O BNG de Xove pide que se habiliten taboleiros ou paneis para a colocación de propaganda electoral

Nota de prensa

O BNG xovense quere unhas eleccións “limpas”

Os nacionalistas presentarán unha moción para que a Administración local habilite taboleiros ou paneis para a colocación de propaganda electoral

En Xove téñeno claro: a pegada indiscriminada de carteis en cada proceso electoral dá mala imaxe. Por esta razón o portavoz do Grupo Municipal do BNG na cámara municipal anunciou a presentación dunha iniciativa que pretende ser exemplarizante. Marco López entende que a ausencia de lugares debidamente indicados e sinalizados para a colocación de propaganda electoral provoca que, elección tras elección, “os carteis electorais se manteñan varios meses, e incluso anos, pegados nos muros e valados”. Iso, segundo o voceiro do BNG, responde a un “modelo obsoleto” de ausencia de compromiso cos valores medioambientais e estéticos “que non pode ter cabida no noso concello”.

López declarou que, tras esta iniciativa no Bloque xovense, “só queda que o pleno aprobe a nosa moción” e, deste xeito, “se habiliten taboleiros ou paneis en todas as parroquias onde poder colocar a propaganda electoral en futuros comicios, a comezar polas vindeiras Eleccións Xerais que se celebrarán o 20 de novembro”. Desde o BNG insistiron en que, así, “daremos unha imaxe moderna e civilizada, o que contribuirá a facer de Xove un municipio atractivo e coidadoso co noso entorno”.