A XUNTA MANTÉN O SEU IMPULSO Á EDUCACIÓN NA PROVINCIA DE LUGO COA INCORPORACIÓN DE ONCE NOVOS CENTROS AO PROGRAMA ABALAR E CATRO Á REDE DE CENTROS PLURILINGÜES
A delegada territorial, Raquel Arias, visitou hoxe o CEIP Rosalía de Castro, na capital, que se incorpora ao programa Abalar no curso 2011-2012
A totalidade de colexios e institutos que se suman ao proceso de informatización das aulas este curso son de titularidade pública
Arias destacou a importancia do desenvolvemento destes programas, que buscan a excelencia educativa e redundan tanto no labor dos profesores coma no rendemento dos alumnos
Lugo , 8 de setembro de 2011.- A Xunta de Galicia, a través da Consellería de Educación e Ordenación Universitaria, sostén a súa aposta pola mellora do ámbito educativo na provincia de Lugo mediante as novas incorporacións ao programa Abalar e á rede de centros plurilingües. En total, once novos centros gozarán da consideración Abalar no curso 2011-12, e catro máis pasarán a formar parte do proxecto de centros plurilingües.
A delegada territorial da Xunta de Galicia en Lugo, Raquel Arias, destacou hoxe durante a visita que levou a cabo ao CEIP Rosalía de Castro, o cal unirase ao programa Abalar este curso, “a importancia destas iniciativas no contexto actual. A formación en idiomas e o manexo das novas tecnoloxías non son xa un plus, senón que son algo básico e indispensable. A Xunta, consciente desta realidade, segue investindo no campo educativo en Lugo”.
Arias, que estivo acompañada polo xefe territorial de Educación, José Jesús Ramos Ledo, e pola responsable de Inspección da citada xefatura, Concepción Aramburu, fixo especial mención “ao apoio do executivo ao ensino público”, destacando que a totalidade de novas incorporacións ao programa Abalar corresponden a centros de titularidade pública.
A delegada declarou que isto “supón un paso máis no labor que a Xunta está a realizar para lograr a excelencia educativa na provincia de Lugo. Así mesmo, isto é reflexo do traballo constante pola educación pública, xa que a presenza deste tipo de centros na rede Abalar mesmo supera a porcentaxe xeral de alumnos que están escolarizados en centros públicos na provincia. Proba disto é que máis dun 86% dos beneficiarios desta iniciativa son colexios e institutos públicos”.
Raquel Arias quixo tamén “agradecer o traballo que están a realizar todos os profesores, porque sen o esforzo dos profesionais da ensinanza non sería posible garantir a calidade do ensino nuns momentos de serias dificultades económicas”.
Ata sete concellos da provincia de Lugo contarán este curso con representación no proxecto Abalar. Estes son o municipio da capital, con cinco centros, Navia de Suarna, Castroverde, Foz, Quiroga, A Fonsagrada e Viveiro, todos eles con un respectivamente. A oferta do programa complétase cos participantes adscritos durante o pasado curso escolar. En concreto, para este 2011-12, haberá un total de 59 colexios e institutos pertencentes a 26 concellos distintos, dos cales 51 son de titularidade pública e 8 corresponden a centros de ensinanza concertada. Arias afirmou que “a implantación deste programa ao longo da provincia responde a necesidade de integrar as novas tecnoloxías na escola, e redundará tanto no labor dos profesores como nos resultados dos alumnos de toda a provincia”.
No relativo á rede plurilingüe para este 2011-12, a provincia de Lugo contará con nove centros, dos cales catro incorpóranse este ano. Así, nos concellos de Lugo e Pontenova, Viveiro e Foz súmanse este ano novos centros nos que se impartirán materias noutros idiomas. Ademais, 42 centros de ensino da provincia dispoñen xa de seccións bilingües.
Proxecto Abalar e centros plurilingües
A consideración de centro plurilingüe enmarca a todos aqueles colexios e institutos nos que se imparte nunha lingua estranxeira áreas ou materias non lingüísticas, de educación primaria e secundaria, ata un terzo do horario lectivo. Estas escolas tamén deben contar cun auxiliar de conversación propio, polo que a interacción entre esta figura, os alumnos e o profesor realízase na lingua estranxeira da que se trate.
Pola súa parte Abalar é o proxecto da Xunta de Galicia para a integración plena das novas tecnoloxías na práctica educativa. Esta iniciativa dota de equipamento aos distintos centros, de recursos educativos para ser utilizados polos profesores, así coma un espazo virtual que pode ser usado tanto polas familias para seguir a evolución dos seus fillos, como polos alumnos para facilitar o rendemento.