Nota de prensa
As traballadoras e traballadores da limpeza no Hospital da Costa de Burela anuncian mobilizacións por un novo Convenio.
Esta é a nota de prensa que enviaramos aos medios en outubro do 2010. Hoxe, despois de case un ano, vémonos na obriga de anunciar que se reanudarán as mobilizacións.
Logo desas mobilizacións do ano pasado conqueriuse que a empresa se sentase a negociar. Froito desa negociación mesmo se chegou ao acordo de que a equiparación total se producise no 2013 e entretanto se fosen dando unha serie de pasos intermedios.
Pero á hora de plasmar eses acordos nun papel para asinalos e darlle validez legal en forma de novo Convenio Colectivo, atopámonos con que empresa non só non respectou eses acordos senón que omite ou mesmo modifica artigos do actual convenio que para nada estaban en cuestionamento nin foran postos enriba da mesa negociadora por ningunha das partes.
É por isto, e insistindo na xustiza e lexitimidade das nosas reivindicacións, que nos vemos na obriga de reanudar o calendario de mobilizacións. Xa que logo, a partir do luns día 3 de outubro e de forma diaria, as traballadoras e traballadores do servizo de limpeza concentraranse ás 10.45 no recibidor do hospital. De non acadar que a empresa reconsidere a súa postura, reservámonos o dereito de adoptar novas e diferentes medidas de presión.