Nota de prensa
A DEPUTACIÓN RECLAMA Á XUNTA A INSTANCIAS DO BNG UN MAIOR PESO DE LUGO NO CONSELLO DE ADMINISTRACIÓN DA AUTORIDADE PORTUARIA
O pleno da Deputación acordou esta mañá instar á Consellaría de Pesca a que modifique a composición do Consello de Administración da Autoridade Portuaria Ferrol – San Cibrao, aumentando a presenza lucense
O grupo do BNG amosou o seu apoio aos dous traballadores despedidos por Suplusa e pronunciouse a favor da readmisión dos mesmos, polo que a Deputación instará a Suplusa a revisar estes despedimentos
Lugo, 25 de outubro de 2011. O pleno da Deputación de Lugo, a instancias dunha iniciativa do BNG, acordou esta mañá dirixirse á Xunta de Galiza, nomeadamente á Consellería do Mar, para instala a que modifique a composición do Consello de Administración da Autoridade Portuaria Ferrol-San Cibrao, para que esta se faga en función da aportación que en concepto de taxas cada un dos portos fai aos ingresos da referida Autoridade Portuaria.
O deputado do BNG, e vicepresidente da Deputación de Lugo, Antonio Veiga, defendeu que con esta iniciativa “pretende lograrse unha redistribución máis equitativa en función do que ingresa en cada porto polo concepto de taxas”. Segundo argumentou Antonio Veiga, “as contas da Autoridade Portuaria Ferrol-San Cibrao non deixan lugar a dúbidas do trato discriminatorio que a mesma mantén en relación coa área da costa de Lugo, limitando a súa actuación ao arranxo e mantemento de faros e balizas, mentres contrasta cos importantes investimentos que a mesma acomete na zona de Ferrol”. Veiga afirmou que “desde o BNG entendemos que esta situación se pode solucionar se aumentamos a representación lucense no Consello de Administración da Autoridade Portuaria, xa que nestes momentos só se limita directamente a un único vogal, o designado alternativamente polos concellos de Cervo e Xove, e quen ten competencias neste sentido é a propia Consellaría de Mar”. Co apoio do grupo provincial do PSOE e a abstención do PP, a iniciativa saiu adiante polo que a Deputación instará á Consellería do Mar, a que modifique a composición do Consello de Administración da Autoridade Portuaria Ferrol-San Cibrao, para que esta se faga en función da aportación que en concepto de taxas cada un dos portos fai aos ingresos da referida Autoridade Portuaria”.
Por outra banda, o portavoz do grupo provincial do BNG, Mario Outeiro, manifestou a aprobación do BNG á moción pola que se insta á Deputación de Lugo a instar a Suplusa a revisar de maneira inmediata os despedimentos de dous traballadores de Suplusa, amosándolle o apoio aos mesmos. Na súa intervención, Mario Outeiro lembrou que “como non podía ser doutra maneira, acorde coa traxectoria do BNG na defensa dos intereses da clase traballadora, neste caso non imos actuar doutra maneira neste conflito. Non obstante, parécenos moi ben a inquedanza actual do PP neste sentido, mais tamén nos gustaría que se estendese á propia Consellaría de Traballo na súa postura perante os diferentes ERES que se presentaron en Galiza, nas que non estivo tan firme. Por iso, aproveito para reivindicar que esta firmeza na defensa da clase obreira que hoxe amosou aquí o PP se manteña diante de propostas de EREs, como o que hai poucos días fixo tambalear os alicerces do emprego mariñao, ou futuras situacións que por desgraza se poidan chegar a producir”.
Mario Outeiro quixo afondar nesta cuestión e manifestou que “a postura do BNG na defensa dos traballadores é igual de firme cando se trata de despedimentos producidos nunha empresa privada ou na administración pública”. Neste sentido, Mario Outeiro dirixiuse ao sr. Barreiro coas palabras “non trate de adiantar ao BNG pola esquerda porque xa imos moi preto da beira e corre o perigo de saírse da estrada”.