Nota prensa
MARÍA XOSÉ VEGA SAE EN DEFENSA DOS SERVIZOS PÚBLICOS EN CONTRA DA “POLÍTICA DE BENEFICIENCIA” QUE APLICA A DEREITA
A Candidata do BNG por Lugo participou nun mitin en Mondoñedo, onde o nacionalismo galego cifrou en oito millóns de euros os investimentos para a comarca que xerou a súa presenza en Madrid
María Xosé Vega puxo como “dramático exemplo” destes recortes o Sergas “onde a Xunta vai deixar sen asistencia médica aos desempregados, xusto os que máis precisan a axuda pública. Pero eles son os que menos protección reciben mentres que para os bancos hai unha chuvia de millóns”.
“Os galegos e as galegos temos dereito a uns servizos públicos, pero o PP prefire optar pola vella e inxusta política da beneficiencia. A este paso, esta dereita vai acabar facendo bo a Franco”, indicou a cabeza de lista do BNG.
O mitin de Mondoñedo tamén serviu para que o BNG presentase o balance do seu traballo nas Cortes en temas referentes a esa comarca, que segundo o candidato ao Congreso Federico Gutiérrez Estoa “demostra que o BNG é o único voto útil”.
“Non houbo tema que afectase á comarca que non fose da nosa atención. A presenza do BNG en Madrid serviu para conseguir uns oito millóns de euros de inversión do Estado aquí, xa que foi a nosa iniciativa a que impulsou, por exemplo, en Mondoñedo a urbanización do entorno do mosteiro de Alcántara, a renovación da Praza do Seminario e da Fonte Vella, en Riotorto a recuperación das ribeiras do río nas Rodrigas ou a rehabilitación de edificios para convertírense en Vivendas de Protección Oficial ou tamén a rehabilitación da antiga fábrica de algas en Ribadeo”, comentou Estoa.