Nota de prensa
A CANDIDATA DO BNG ÚNESE AO BERRO COLECTIVO CONTRA A DITADURA DOS ESPECULADORES FINANCEIROS
María Xosé Vega apostou pola banca pública nun mitin en Riotorto, onde o alcalde, Federico Gutiérrez Estoa, denunciou a catástrofe que supón o enorme aumento do paro na comarca, golpeada polos continuos EREs
“Resulta impresentábel que á nosa mocidade só lle dean a elixir entre o paro e a emigración. E aínda é máis grave que ademais se lle queira quitar á palabra á xente para poñerse ás ordes dunha elite depredadora á que ninguén votou. Como están a facer milleiros de persoas nas rúas, dende o BNG unímonos a ese berro contra os escándalosos beneficios que se reparten os especuladores financeiros mentres o resto camiña cara a miseria”, indicou María Xosé Vega, que puxo como exemplo desta inxustiza o que ocorreu coas caixas galegas: “Hai que pedirlle á Xunta que aposte agora que pode pola banca pública, tal e como levamos moito tempo pedindo dende o BNG. Necesitamos un instrumento que faga circular o crédito ás familias e as pequenas empresas”.
A cabeza de lista por Lugo tamén destacou os beneficios que supuxo para Galiza a presenza do BNG no Congreso dende 1996. “En calquera comarca deste país hai unha proba da utilidade que ten o voto ao nacionalismo galego e coñécese algún investimento que só chegou grazas á nosa insistencia en Madrid”, destacou.
Pola súa parte, o alcalde de Riotorto, Federico Gutiérrez Estoa, denunciou a dramática suba do paro na zona nos últimos meses, con tres procesos de EREs “que están a converternos nun deserto industrial se non lle poñemos remedio, e o remedio pasa polo voto ao BNG”. “Temos que cortarle a billa á banca e aos especuladores e rexeitar ás forzas políticas que non son máis que sucursais da gran patronal e por riba só aplican a austeridade sobre os instrumentos públicos máis necesarios para crear emprego”, afirmou.