Nota de prensa
REFERENCIA
A Xunta convoca 2.000 novas acreditacións profesionais en atención sociosanitaria e amplía a oferta a redeiras, tubeiros e camareiros
A directora xeral de Formación e Colocación, Ana María Díaz, presentou hoxe a nova convocatoria para o procedemento de receñecemento das competencias profesionais
Un total de 2.450 galegos e galegas que teñan experiencia laboral ou aprendizaxes non formais nestas profesións poderán obter unha acreditación oficial das súas competencias profesionais
As 2.450 acreditacións que se certificarán- 2.000 en atención sociosanitaria e 450 que por primeira vez se ofrecen para labores de redeiras, tubeiros e camareiros- súmanse ás 800 que xa se deron este ano en atención sociosanitaria
Santiago, 5 de decembro de 2011.- Un total de 2.450 galegos e galegas poderán acreditar a súa experiencia laboral nas profesións vinculadas á atención sociosanitaria para persoas dependentes, e tamén nas profesións de redeiras, tubeiros e camareiros, xa que a Consellería de Traballo e Benestar vén de publicar no Diario Oficial de Galicia (DOG) unha nova convocatoria de acreditacións profesionais que inclúe diversas novidades para mellorar e ampliar este procedemento. Estas 2.450 acreditacións súmanse ás 800 que xa se ofertaron en atención sociosanitaria este ano.
A directora xeral de Formación e Colocación, Ana María Díaz, presentou hoxe o novo procedemento de recoñecemento das competencias profesionais que permite un recoñecemento oficial da experiencia laboral ou aprendizaxes non formais. A responsable da área autonómica explicou que principalmente son tres as novidades que inclúe esta convocatoria.
En primeiro lugar, destacou que se recollen novas profesións, as de redeiras, tubeiros e camareiros, que se suman á atención sociosanitaria que se leva convocando desde 2011. De feito, a Xunta xa ten acreditadas a 4.600 persoas neste campo, a través deste procedemento, así como de cursos de formación certificable.
Nos traballos de redeiras, tubeiros e camareiros convócanse por primeira vez 450 acreditacións: 200 en confección e mantemento de artes e aparellos dirixidas ás redeiras; 150 para a fabricación e montaxe de instalacións de tubaxe industrial; e 100 para operacións básicas de restaurante e bar.
Díaz sinalou que a segunda novidade deste novo procedemento radica na ampliación do número de prazas nas profesións de axuda a domicilio e de coidadoras ou xerocultoras e categorías similares na área de coidados a persoas dependentes. Explicou, ao respecto, que tras o éxito acadado na última convocatoria destas acreditacións profesionais – rexistráronse preto de 6.000 solicitudes- a Consellería de Traballo e Benestar decidiu convocar un novo procedemento que permitirá a obtención de 2.000 novas acreditacións.
“Darase prioridade a aquelas persoas que participaron na primeira convocatoria deste ano e non lograron acreditar todas as súas habilidades profesionais, de xeito que desta vez consigan acreditar o que lles quedou pendente e podan así conseguir o certificado de profesionalidade”, indicou. É preciso destacar que todas aquelas persoas inscritas na anterior convocatoria e que presenten solicitude de inscrición nesta non terán que achegar a documentación presentada anteriormente, podendo actualizar a experiencia laboral e as aprendizaxes non formais.
Para as auxiliares de axuda no fogar e categorías similares ofértanse 1.000 acreditacións e para as coidadoras e xeroculturoas convócanse outras 1.000 prazas de atención sociosanitaria a persoas dependentes en institucións sociais.
“Esta ampliación débese á necesidade de contar cunha profesionalización das persoas que se dedican ao coidado de persoas dependentes ben a través dun certificado de profesionalidade ou dun título de formación profesional, e deste xeito, ademais, contribuímos a visibilizar o traballo das persoas coidadoras a través desa profesionalización”, lembrou Díaz.
Ao respecto, salientou que en Galicia, un dos colectivos prioritarios en acreditar as súas competencias é o sociosanitario en persoas maiores ou dependentes como consecuencia da entrada en vigor da Lei de Dependencia no ano 2006, xa que esta normativa establece que entre 2012 e 2015 todas as persoas que traballen como persoal auxiliar, a domicilio ou en residencias e institucións sociais deben posuír unha determinada formación ou unha acreditación oficial da súa competencia profesional.
Prazo de inscrición
Establecéronse dous prazos de inscrición: para a convocatoria de atención sociosanitaria e redeiras a presentación de solicitudes rematará o 31 de decembro, mentres que para as profesións de tubeiro e axudante de camareiro e bar será do 1 ao 31 de marzo de 2012.
Por último, a terceira novidade deste procedemento refírese ao aumento do número de profesionais expertos habilitados para asesorar e avaliar ás persoas candidatas. Tamén incrementaranse os puntos de información que se sitúan nas diferentes oficinas de emprego do Servizo Público de Emprego de Galicia, nas xefaturas territoriais da Consellería, nos centros propios de formación profesional do departamento autonómico, na Fundación Galega da Formación para o Traballo e no Instituto Galego das Cualificacións. Tamén se aumentarán os centros que serán sede do procedemento.
Para concluír, a directora xeral apuntou que “as acreditacións teñen carácter estatal e efectos profesionais e académicos, é dicir, convalidacións nos módulos da FP inicial que oferta a Consellería de Educación ou da formación para o emprego que oferta o departamento de Traballo e Benestar”. Lembrou que o proceso realízase en tres fases. Na primeira, de asesoramento, axúdase a cada persoa a xustificar ou documentar a súa competencia; na segunda fase, a de avaliación, unha comisión elabora a partir do dossier un plan individualizado para cada candidato co obxectivo de que poida demostrar o seu desempeño profesional; e, por último, as persoas que superen a fase de avaliación poderán, entón, acreditar a súa competencia profesional.