IES Monte castelo de Burela imparte un curso de Instructor de FS en colaboración coa federación galega

Nota de prensa

ENSINO DE REFERENCIA

Os futuros adestradores mariñáns da base avanzan a pasos axigantados na súa aprendizaxe de Instrutor Fútbol Sala, no curso que este ano académico acolle o IES de Burela Monte Castelo coa organización da Federación Galega de Fútbol. A educación física de base, que imparte estes días o director da ED EON Burela FS, Alfonso Mera, marca o ecuador do bloque común do ciclo, cunha matrícula de 18 alumnos/as.

“Nestas sesións achegámonos aos medios e obxectivos do adestramento, capacidades físicas básicas, planificación da tempada e factores de rendemento” explicou Alfonso Mera, que fixo especial atención na programación á hora de traballar cos máis pequenos. “O máis importante no ensino de base é ter claros os contidos que se queren traballar, tendo en conta as características físicas do neno e a súa idade, e a partir de aí establecer unha planificación de medios e tarefas para chegar aos obxectivos marcados”. “Moitas veces ao adestrar con nenos tende a improvisarse ao entender a práctica deportiva coma un simple xogo; no entanto cun traballo planificado por parte do adestrador o neno pode divertirse igual e así poderá construir unha base sólida na aprendizaxe dese deporte” engadiu o director da base laranxa.

O de Burela é o único curso da devandita especialidade que se imparte en Galicia en 2011-12. Baixo a coordinación do ex-adestrador do Superti-A Pontenova, José Ramón Rodríguez, Josiño, e cun total de 280 horas entre formación teórica e práctica, o alumnado obterá o certificado de Instrutor de Fútbol Sala Base (nivel 1) en xuño de 2012.