Isaac Díaz Pardo, sempre na memoria

D. ISAAC DÍAZ PARDO

Sempre na memoria

O grupo de teatro “ O Bordelo” de Cervo no día do estreno da súa décimo cuarta obra síntese consternado ó coñece-la nova do pasamento de D. Isaac Diaz Pardo ,egrexio galego, a quen pola súa laboura cultural e industrial tanto debe o pobo de Cervo, A Mariña e Galiza enteira.

O traballo exemplar de D. Isaac Díaz Pardo, transformando os nosos recursos naturais en valores artísticos e culturais, quedará para sempre como modelo a seguir por todos aqueles que sentimos querencia pola nosa terra.

O noso sinceiro agradecemento pola súa traxectoria exemplar como mecenas ,esforzándose en sacar adiante todos cantos proxectos se puxeron ó alcance das súas posibilidades, polo seu apoio demostrado ó teatro afeccionado, en especial ó teatro realizado aquí na Mariña e polo seu inconformismo , empeñado en demostrar que se pode vivir forxando soños.

O Bordelo non esquece que naceu e medrou no Auditorio de Sargadelos, sempre co apoio incondicional de D. Isaac, á cabeza, e de todos cantos compoñían o seu equipo. Esa man tendida para os que comezamos sen nada ten que servirnos de exemplo para unir esforzos, para demostrarlle ó mundo que somos capaces de manter vivo e activo o espirito de Sargadelos.

A gratitude colectiva e o recordo para sempre na memoria ha de ser a homenaxe máis sentida dun pobo agradecido que o descanso en Paz teno ben merecido.

Francisco Piñeiro , director de O Bordelo