Nota de prensa
OS SOCIALISTAS ASEGURAN QUE HAI MOITOS SERVIZOS INNECESARIOS QUE RECORTAR ADEMAIS DE AFORRAR EN CONSUMO ELÉCTRICO
-A situación económica que estamos vivindo é complexa, pero “tan só prescindindo dos servizos da asesora de políticas sociais, que non aporta nada, aforraríamos bastantes máis cartos”
-Esíxenlle a Villares que actúe con rigurosidade e madurez, “non se entende que antes das eleccións municipais instale puntos de luz por todo o concello e meses despois os apague”
CERVO, 11 DE XANEIRO. O Concello de Cervo tratará de recortar gastos no consumo eléctrico municipal. O Grupo Municipal Socialista asegura que “hai moitos servizos innecesarios que recortar antes de tomar este tipo de medidas. Cremos que o equipo de goberno, que está moi pola labor de revisar cada euro que gasta dos presupostos municipais, debería revisar e estudiar mellor de onde e cómo recorta”.
Segundo palabras propias do señor alcalde, Alfonso Villares, con esta iniciativa será posible aforrar uns 12.000 euros. Os socialistas subliñan que a situación económica actual é complexa, pero “sería tamén moi convinte recortar algúns servizos superfluos que só dan gasto ós veciños. Tan só prescindindo dos servizos da asesora de políticas sociais que temos no concello, aforraríamos bastantes máis cartos”. Engadiron que “é un servizo que non aporta nada, a Xunta está recortando máis ca nunca nesta materia, e non amosa ter moito traballo. Un Concello coma Cervo non pode asumir este gasto, non se pode solucionar a xubilación dunha persoa a costa dos cervenses”.
Por outra banda, os socialistas lembraron que dentro dos fondos do Plan E do ano 2009, o señor Villares adicou máis de 300.000 euros á elaboración dun plan de aforro enerxético, pero “a día de hoxe non sabemos canto se aforrou ou cales foron os resultados dese plan, agradeceríamos que o señor alcalde fixese pública toda esa información”.
Dende o GMS destacan que “é vergoñenta a actitude do señor Villares, non se entende a súa incoherencia. Agora aforraremos en consumo eléctrico, debe ser a moda, pois xusto antes das eleccións municipais adicouse a instalar diversos puntos de luz por todo o concello, meses despois dálle por apagalos. O seu criterio non ten outro sentido que non sexa rédito político ou pago de favores. As necesidades do concello están, coma sempre, en segundo lugar”.
Pedímoslle, señor alcalde, que “actúe con rigurosidade e madurez, se recorta certas prestacións das que se benefician tódolos veciños tamén pode pensar en prescindir de servizos como os da asesora de políticas sociais ou dalgunha das dedicacións exclusivas ou parciais das que disfrutan todos os membros do equipo de goberno, todos están cobrando, sexa dunha forma ou doutra. De ahí tamén se podería aforrar, e moito”.