Nota de prensa
OS SILOS DE CEMENTO DO PORTO DE BURELA SERÁN DEMOLIDOS EN BREVE. A OBRA TERÁ UN CUSTO DE 98.000 EUROS. A CONCELLEIRA DE MAR, PATRICIA LÓPEZ EIJO, CONSIDERA QUE O ESPAZO PORTUARIO GAÑARÁ EN ESTÉTICA E COMODIDADE.
López Eijo indicou que “a concesión, que era propiedade de Cementos Rezola, extinguiuse, co que só cabía a posibilidade que agora se plantexa. De feito, coa chegada ao goberno municipal do Partido Popular xa se lle plantexou a Portos de Galicia a necesidade de demoler os silos, tendo en conta que non existe, desde hai anos, carga e descarga de cemento no porto burelés. Agora, co remate da concesión, estou segura de que imos gañar tanto a nivel estético coma en comodidade, xa que ocupaban o centro da explanada, prácticamente te pegabas con eles de frente, e ao demolerse se gañará en espazo”.
A concelleira de Mar e Medio Ambiente dixo que “a obra ten un custo de noventa e oito mil euros e un prazo de execución dun mes a partires de notificación da concesión da licenza de obra, que xa foi asinada polo alcalde”.
López Eijo recoñece que “no seu momento esta infraestrutura foi de grande importancia para o desenvolvemento do porto de Burela, xunto coas instalacións que tiñan no Penaoural, preto das chabolas. Pero os tempos cambian, e agora o mercado do cemento está esgotado. De feito, a concesionaria xa cerrara as instalacións do Penaoural hai un montón de anos”.
Finalmente, Patricia López Eijo manifestou que “esta actuación vai permitir, xunto con outras que está a realizar ou se concretarán a medio prazo por parte de Portos de Galicia, unha mellora substancial das condicións de uso das instalacións do porto burelés, sempre de acordo co sector pesqueiro e co Concello”.