Nota de prensa
Máis de 300 persoas inician hoxe as probas de selección de persoal para o parque de bombeiros de Monforte
– Os aspirantes ás 19 prazas realizaron no Pazo de Feiras e Congresos as probas teóricas cuxos resultados se publicarán nos vindeiros días en www.salvamentolugo.org e www.natutecnia.com
– O proceso de selección continuará os vindeiros mércores e xoves coas probas físicas e rematará cos exames sobre o ámbito xeográfico, o galego e as probas psicolóxicas o 22 e 23 de febreiro
– Coa próxima incorporación do complexo monfortino ó Consorcio, serán 120 os empregos creados por Deputación de Lugo e Xunta para a cobertura contraincendios na provincia luguesa
O proceso para cubrir as 19 prazas ofertadas para o parque da cidade do Cabe continuará coas probas físicas que tamén terán lugar os vindeiros mércores e xoves, 15 e 16 de febreiro, tamén na cidade luguesa, concretamente, no Pavillón Universitario, nas pistas de atletismo Gregorio Pérez e nas piscinas As Pedreiras. Os participantes deberán realizar, neste caso, as seguintes probas: gabeo por corda, press banca, carreira 100 metros lisos, salto de lonxitude, carreira 1.500 metros lisos e natación 50 metros. Os exames sobre o ámbito xeográfico de Lugo, o idioma galego e probas psicolóxicas os 22 e 23 de febreiro porán fin á selección de persoal.
Creación de emprego
Cos profesionais que resulten seleccionados, serán un total de 120 os novos postos de traballo creados polo Consorcio Provincial de Bombeiros para prestar cobertura contraincendios na provincia. É e que os parques da zona sur (Monforte, Sarria e Chantada) contan cada un con 19 efectivos, mentres que os da zona norte (Barreiros, Vilalba e Viveiro) teñen 21, respectivamente. Esta diferencia de profesionais débese ás melloras presentadas polas empresas adxudicatarias da xestión indirecta dos complexos.
O Consorcio garante, deste xeito, a cobertura contrainendios no 90% de Lugo as 24 horas dos 365 días ó ano. No norte lugués, as instalacións de Barreiros, Viveiro e Vilalba atenden 25 Concellos e no sur, as de Chantada, Sarria e Monforte prestan servizo noutros 25 municipios. De calquera xeito, as actuacións destes profesionais non se limita ós Concellos de cobertura prioritaria, senón que tamén teñen lugar fóra dos límites dos mesmos, tanto a nivel comarcal e provincial, como autonómico.
Integración ó Consorcio
A selección de persoal é o seguinte paso de cara á incorporación das instalacións monfortinas ó Consorcio. No Orzamento para 2012 do organismo contémplase a partida necesaria para esta integración que, ademais do reforzo do cadro de persoal, leva consigo a mellora e adaptación das dependencias e o equipamento co fin de que o parque teña as mesmas características cos outros 5 do Consorcio (Sarria, Chantada, Barreiros, Viveiro e Vilalba). Para elo, está previsto adquirir 1 camión bul e outro lixeiro, quedando 4 vehículos preparados para cubrir emerxencias ó igual que nas restantes instalacións contraincendios. Tamén se mercará todo o material interior necesario, é dicir, dende mobiliario ou material informático ata traxes de protección ou ferramentas. Este investimento nas instalacións monfortinas respostan ás necesidades detectadas polos técnicos na súa visita a este complexo.