O Bloque de Xove solicita a retirada da cabina telefónica dos taxis por obsoleta

Nota de prensa

O Bloque de Xove solicita a retirada da cabina telefónica dos taxis por “obsoleta”

Os nacionalistas xovenses presentarán unha moción para que o goberno local se implique na mellora do servizo de taxi no municipio e instale, tamén, sinais verticais nas paradas

Os poderes públicos impóñenlles aos taxistas inspeccións, cargas tarifarias e autorizacións previas obrigatorias. Ese control da Administración, segundo o BNG de Xove, debería obrigar as autoridades a implicarse na mellora das condicións nas que os taxistas desenvolven a súa actividade e a responsabilizarse das deficiencias do servizo que son alleas aos propios profesionais.

O voceiro municipal do grupo nacionalista en Xove, Marco López, entende que a cabina telefónica situada na Avenida Deputación, á altura da Cafetería Mera, “foi utilizada hai tempo polos taxistas do noso municipio, pero na actualidade atópase nun máis que lamentable estado e en completo desuso”. O portavoz do Bloque asegura que este aparello perdeu a súa funcionalidade “por estar obsoleto”, pero tamén porque se atopa instalado “na marxe contraria” da parada.

Asemade, desde o Bloque xovense entenden que é función do goberno local sinalar debidamente a ubicación das liñas oficiais de taxi e velar para que o grande espazo que ocupa a cabina situada sobre a beirarrúa “non provoque molestias aos peóns, tal e como vén acontecendo”.