Medio Rural e do Mar convoca 4 permisos de explotación para Celeiro e San Cosme de Barreiros
Nota de prensa
A XUNTA CONVOCA 4 NOVOS PERMEX DE MARISQUEO A PÉ PARA A CONFRARÍA DE CELEIRO E PARA A AGRUPACIÓN DE MARISCADORAS DE SAN COSME DE BARREIROS
Santiago, 8 de marzo de 2012.- A Consellería do Medio Rural e do Mar convoca 2 novos permisos de explotación para a confraría de pescadores de Celeiro e outros 2 para a Agrupación de Mariscadoras de San Cosme de Barreiros. Estas novas incorporacións, dirixidas á actividade extractiva para o marisqueo a pé, son unha mostra máis da aposta da Consellería do Medio Rural e do Mar pola xeración de actividade e o incremento dos postos de traballo para a incorporación de xente nova ao marisqueo, especialmente no contexto de crise económica actual.
Para poder optar aos permisos de explotación, os solicitantes deben cumprir, entre outros, os requisitos esixidos no Decreto 425/1993, do 17 de decembro, polo que se regulan os permisos de explotación para exercer a actividade pesqueira e marisqueira e presentar a documentación requirida pola Consellería do Medio Rural e do Mar. O prazo de presentación de solicitudes será de 15 días hábiles dende mañá, tras a publicación desta convocatoria no taboleiro de anuncios da xefatura territorial e na páxina web da Consellería http://conselleriamar.xunta.es.
As solicitudes presentaranse nas oficinas de rexistro da Xunta de Galicia, oficinas de correos ou no resto de lugares indicados na Lei de réxime xurídico das administracións públicas e do procedemento administrativo común. Unha vez rematado o prazo de solicitude, a Consellería do Medio Rural e do Mar procederá á súa valoración.
Cabe lembrar que todas as prazas se convocan despois de comprobar a súa viabilidade nos informes técnicos e sempre tendo en conta a compatibilidade e sostibilidade dos recursos e criterios socieconómicos.