Nota de prensa
A deputada popular Emma Álvarez Chao indica que esta situación está a afectar directamente a economía do Concello e pon en perigo a propia Festa da Troita, declarada de Interese Turístico Galego
O PARLAMENTO APROBA, A INICIATIVA DO PPDEG, ESTUDAR O DESCENSO DA POBOACIÓN DE TROITAS NO RÍO EO NA PONTENOVA E FORMULAR ACCIÓNS ENCAMIÑADAS AO DESENVOLVEMENTO DESTA ESPECIE NO ZONA
“Todas as medidas que se realicen para acercalo a niveis de poboacións de troita similares aos anos pasados suporía unha reactivación económica da zona vinculada ao turismo” segundo Álvarez Chao
Posibles casos de contaminación puntual, vexetación de ribeira, presenza de enfermidades nos salmónidos, diminución dos caudais medios anuais, alteracións ecolóxicas, furtivismo, presión pesqueira ou existencia de predadores como a carpa terían que ser estudados como causas deste descenso, segundo a deputada popular
Santiago de Compostela, 20 de marzo de 2012.- O Parlamento de Galicia aprobou na sesión da Comisión de Agricultura celebrada hoxe unha iniciativa do PPdeG, na que se abstiveron os grupos parlamentarios do PSdeG-PSOE e BNG, encamiñada a realizar un estudo que profundice nas causas do descenso de poboación de troitas no río Eo, no seu tramo alto dende A Pontenova, e formular accións e medidas a realizar para cumprir coas condicións dos hábitats para o desenvolvemento da especie.
A iniciativa popular ven motivada ante o feito do descenso desta poboación “posto de manifesto có gallo da Festa da Troita que pasou de superar os 90 quilogramos hai uns anos a pouco máis de 15 na pasada edición” segundo Emma Álvarez. A deputada popular resaltou así o descenso poboacional acusado na troita común “que pasou de 0,33 individuos por metro cadrado no inventario do 96 a 0,13 no do 2007”.
“Aínda que a sabiduría popular pode estar no certo no referente aos motivos principais desta escasez e a basean no incremento dos tramos sombríos no río, a sucidade existente en moitos puntos e a abundancia de carpas ou outros depredadores” segundo Álvarez Chao “é necesario que a Xunta de Galicia realice un estudio que afonde nas causas co obxectivo de adoptar as medidas necesarias para cumprir coas condicións dos hábitats e facilitar o desenvolvemento desta especie” .
Posibles casos de contaminación puntual, vexetación de ribeira, presenza de enfermidades nos salmónidos, diminución dos caudais medios anuais, alteracións ecolóxicas, furtivismo, presión pesqueira ou existencia de predadores como a carpa terían que ser estudados como causas deste descenso, segundo a deputada popular.
Para Álvarez Chao a situación actual está a afectar directamente a economía do concello de A Pontenova ao verse truncados os ingresos procedentes da práctica da pesca de troitas polo descenso da especie e mesmo a propia Festa da Troita onde está moi arraigado o concurso de pesca “Festa da Troita de A Pontenova”.
“Polo tanto , indicou a deputada popular, todas as medidas que se realicen para acercalo a niveis de poboacións de troita similares aos anos pasados suporía unha reactivación económica da zona vinculada ao turismo, reactivación necesaria en tempos de crise ademais de mellorar a saúde medioambiental do río Eo”.
A deputada do PPdeG lamentou a abstención de socialistas e nacionalistas nunha iniciativa dun claro “interese medioambiental, ecolóxico e económico para a zona de A Pontenova”