Nota de prensa
PRESENTOUSE NA DEPUTACIÓN O PROGRAMA “A ARTE DE SER MULLER NUN MUNDO POR COMPARTIR 4.0”, CON MOTIVO DO DÍA INTERNACIONAL DA MULLER
Antonio Veiga destacou a importancia deste tipo de programas a prol da igualdade entre homes e mulleres
Mario Outeiro puntualizou “que ademais de algo moral, se trata dunha obriga, no cumprimento da Lei Orgánica 3/2007 do 22 de marzo”
Mañá, 8 de marzo, Día Internacional da Muller terá lugar a inauguración dunha exposición artística baixo o mesmo nome que engloba todo o programa, que estará aberta ao público durante un mes na sala de exposicións do Pazo de San Marcos. Previamente á inauguración, haberá unha recepción, no Refectorio do Museo Provincial de Lugo, a cargo do vicepresidente da Deputación, Antonio Veiga, e do delegado de Cultura e Turismo, Mario Outeiro, seguida da conferencia “Muller e literatura” a cargo de Teresa Moure, que servirán de apertura o variado programa de actividades que presentado hoxe.
Antonio Veiga destacou a importancia “deste tipo de programas en prol da igualdade” e lembrou que “no mes de marzo hai dúas efemérides importantísimas para a clase traballadora; refírome ó 8 de marzo que é o día da muller traballadora e o 10 de marzo que é o día da clase traballadora galega, e falar de muller e falar de traballo é algo que vai estritamente unido, e por iso dende a Área queríamos facer unha pequena reflexión sobre a situación laboral da muller despois de todos estes obradoiros e xornadas que se van levar a cabo”.
Mario Outeiro, pola súa banda, explicou que “ ademais de facelo por todos os motivos explicados polo vicepresidente, é tamén unha obriga de todas as administracións, organismos e entes públicos en cumprimento da Lei Orgánica 3/2007 do 22 de marzo para a igualdade efectiva entre mulleres e homes, pola que no artigo 26.2 se establece que todos os entes públicos que de xeito directo ou indirecto configuren a rede pública de xestión cultural, como é o caso da Rede Museística Provincial, deben desenvolver iniciativas destinadas a favorecer a promoción específica das mulleres na cultura e combater a súa discriminación estrutural, e ao mesmo tempo, xerar políticas activas á creación e produción artística de autoría feminina”