O Rincón de Anita acadou o segundo premio
A CARRILLEIRA EN SALSA DE NAMARINOS É A GAÑADORA DA IX RUTA DE TAPAS QUE SE CELEBROU EN FOZ A PASADA FIN DE SEMANA.
Foz, 11 de abril de 2012. A carrilleira en salsa de Namarinos é a gañadora da IX Ruta de Tapas que se celebrou en Foz os pasados 6 e 7 de abril. A Asociación de Comerciantes, Industriais e Autónomos entregarálle un trofeo e un diploma acreditativo nun acto que se desenvolverá a vindeira semana.
O segundo premio da IX Ruta de Tapas de Foz é para as oliñas de O Rincón de Anita e o terceiro para o caramelo con queixo de tetilla de pastelería Anduriña. Estes dous establecementos recibirán sendos diplomas acreditativos, segundo confirmaba esta mañá o presidente de ACIA.
José Carlos Paleo agradece a todos os locais a súa participación na IX Ruta das Tapas e recoñece o esforzo creativo realizado por todos para sorprender á súa clientela. O responsable de ACIA subliña “a acollida que tivo un ano máis esta tradicional cita en Foz”.