Unha delegación do goberno de Ortigueira visitou Cervo para coñecer o programa de compostaxe doméstica
-O programa espertou o interese do Concello de Ortigueira, que viaxou ata o municipio cervense para interesarse polos detalles da iniciativa
-A delegación ortegana visitou tamén algúns dos fogares que xa practican a compostaxe a través dos elementos achegados polo Concello cervense
O rexedor de Cervo, Alfonso Villares, e a edil de Medio Ambiente, Begoña Alonso, recibiron aos membros da delegación ortegana e encargáronse de explicarlles todos os detalles do programa, dende a adquisición de composteiros por parte do Concello ata a fase de seguimento na que se supervisa a boa utilización dos mesmos e se trata de coñecer os resultados que conseguen os usuarios con esta práctica.
Ademais de interesarse pola iniciativa e coñecer como se leva a cabo, o alcalde de Ortigueira e os seus acompañantes puideron comprobar directamente o desenvolvemento do programa, visitando algúns dos fogares que participan nel e falando con algunhas desas familias que lle sacan rendemento aos composteiros entregados polo Concello. “Estamos moi satisfeitos de que a nosa experiencia co programa de compostaxe doméstica poda ser de utilidade para outros concellos, como é o caso de Ortigueira” explica o alcalde cervense “e ao mesmo tempo alégranos saber que a compostaxe se vai convertendo cada vez máis nunha aposta de moitos municipios como o noso” engade Villares.
O programa de compostaxe doméstica do Concello de Cervo estendeu a práctica da conversión de residuos en materia orgánica a un total de 73 familias cervenses, que no seu momento solicitaron os composteiros. Hai unhas semanas facíase entrega da remesa máis recente, da que se beneficiaron 15 familias
Remitir