Manuel Lourenzo impartirá un curso de interpretación teatral en Mondoñedo

MANUEL LOURENZO IMPARTIRÁ UN CURSO DE INTERPRETACIÓN TEATRAL EN MONDOÑEDO

A inscrición para o curso organizado ao abeiro de Buxiganga que se celebrará en xullo permanece aberto xa que aínda hai prazas libres

Terá lugar os días 7, 14, 21 e 28 de xullo de 9.00 a 14.00 horas na Casa da Xuventude de Mondoñedo

Lugo, 27 de xuño de 2012. A Área de Cultura da Deputación de Lugo mantén aberto o prazo de inscrición para o curso de interpretación teatral, dentro do proxecto de formación de Buxiganga, que impartirá Manuel Lourenzo en Mondoñedo, que terá lugar os días 7, 14, 21 e 28 de xullo de 9.00 a 14.00 horas na Casa da Xuventude. Aínda existen prazas libres dun obradoiro teatral que en total ten 20 prazas. O curso ten un custe de 20 euros, cun custe reducido de 10 euros para os participantes nos circuítos de Buxiganga 2012.

O curso ten por título “O corpo no espazo”, e trátase dun curso intensivo de teatro que ten como obxectivo a preparación para unha creación teatral consciente e motivadora. Exercicios do corpo e da voz –sensibilización, ritmo, acción, interpretación– na procura da definición de teatro como fiel e constante metáfora da vida humana.