O IES ILLA DE SARÓN DE XOVE AUMENTA A SÚA OFERTA EDUCATIVA CUN NOVO CICLO FORMATIVO.
A partir do vindeiro curso o IES Illa de Sarón de Xove aumentará a súa oferta educativa coa posta en marcha do Ciclo Formativo de Grao Superior de Programación da produción en moldeamento de metais e polímeros (2.000 horas) Trátase dun ciclo da familia de Fabricación mecánica dirixido a planificar, programar e controlar a fabricación por fundición, pulvimetalurxia, transformado de plásticos e de materiais compostos, orientado á formación de operarios de produción específicos para plantas de fundición e modelaxe, tanto no sector metalúrxico como de polímeros
Este ciclo, único en Galicia, ofértase no réxime das persoas adultas na modalidade presencial (oferta modular). A matrícula por módulos permite que cada persoa deseñe o seu itinerario formativo e, neste caso, ofértanse 6 módulos con 22 prazas por módulo para o curso 2012-2013
No IES Illa de Sarón este ciclo vén unirse ao PCPI de Informática e ao Ciclo Medio de Sistemas microinformáticos e redes, para completar a oferta formativa deste centro para o curso 2012-2013.
O prazo de preinscrición para todos estes estudos remata o día 2 de xullo de 2012 ás 13 horas, en período ordinario, aínda que haberá un período extraordinario entre o 3 e o 12 de setembro. Para calquera información poden chamar ao teléfono 982 59 21 68