OS SOCIALISTAS ESIXEN QUE OS RECORTES DA XUNTA NON SUPOÑAN UNHA MERMA DO SERVIZO DE SOCORRISMO NAS PRAIAS DE CERVO
-Lembran que o ano pasado o señor Villares “xustificou a contratación de 20 vixiantes por temas de seguridade, menos eran insuficientes, esperamos que o criterio este verán sexa exactamente o mesmo”
-En canto á perda de bandeiras azuis, “non nos afectará porque por segundo ano consecutivo non contamos con ningunha, ó alcalde non lle preocupa a repercusión económica que isto ten para concello”
CERVO, 15 DE XUÑO. Os recortes da Xunta de Galicia parece que tamén afectarán á seguridade nas praias durante este verán, o número de socorristas pode verse reducido e, en consecuencia, afectar á perda de bandeiras azuis, así o alertaron hai uns días a maioría dos medios de comunicación. Os socialistas de Cervo subliñan que “no tema das bandeiras azuis non nos veremos afectados porque xa non gozamos de ningunha grazas á pasividade do señor alcalde, Alfonso Villares, pero esiximos que o servizo de socorrismo non se vexa para nada afectado”.
Lamentan que “por segundo ano consecutivo, quedamos sen este galardón do que levábamos disfrutando dende o seu inicio. Esta vez o equipo de goberno nin sequera fixo as solicitudes e alegou motivos que non convencen a ninguén”.
As bandeiras azuis non son motivo de preocupación para este goberno “ou polo menos así o demostran. Agardamos que teñan outra actitude con respecto ó número de socorristas que necesitamos para contar coa seguridade adecuada e que dende o goberno local se faga todo o posible para que este servizo non se vexa en ningún momento mermado”.
Dende o PSOE de Cervo lembran que “o ano pasado comezamos o verán con 17 vixiantes, servizo ó noso entender máis que ben dotado, o goberno calificouno de insuficiente e en agosto contrátaronse tres máis, alcanzando un total de 20 socorristas. O señor Villares xustificou esta decisión por temas de seguridade, esperamos que o criterio para este verán sexa exactamente o mesmo”.
Os socialistas engaden que “nun concello coma o noso no que o turismo e a hostelería son un motor importante para a economía de tódolos cervenses, tanto as bandeiras azuis coma un adecuado servizo de vixiancia nos areais son reclamo indiscutible para turistas e visitantes, pero o señor Villares parece ignorar este asunto ano tras ano”.