HOXE CREÓUSE UN GRUPO DE TRABALLO NO CONCELLO PARA PREPARAR AS ACTIVIDADES CULTURAIS QUE SE DESENVOLVERÁN O VINDEIRO ANO ENTORNO Á FESTA CASTREXA.
O rexedor lembrou que “xa cando se celebrou a festa castrexa falando con ACIA Burela entendíamos que non estaría de máis, senón todo o contrario, potenciar a parte cultural da festa castrexa. E a nós ocurríusenos a idea de ir configurando unha especie de seminario de estudios, unha semana de estudios históricos ou unhas xornadas de análises históricos vinculados con Burela coa tradición castrexa e con outros posibles temas que puidesen ir xurdindo”.
González Barcia relatou que “para plantexar esta posibilidade tivemos esta mañá unha xuntanza no Concello con persoas que son profesionais da historia: Aurelia Balseiro, Herminia Pernas e Bríxida Pino e se incorporará tamén Emilia García e algunha persoa máis. No que quedamos foi en poñer en marcha un grupo de traballo para configurar o aspecto cultural da festa castrexa, atendendo fundamentalmente a que nestes primeiros anos haberá que centrarse na promoción e divulgación de todo o que ten que ver coa sociedade, coa cultura e coa relixión castrexa co obxectivo de darlle un sentido cultural a esta festa, que foi todo un éxito”. O equipo de goberno está disposto a colaborar con ACIA Burela en todo o que poida e a configurar unha fin de semana que poida atraer xente.
O alcalde engadiu que “á volta do verán, aló polo outono, haberá unha próxima reunión na que empezaremos a sentar as bases do que queremos que sexa o aspecto cultural da festa castrexa do vindeiro ano. Hoxe foi unha primeira toma de contacto, as persoas asistentes estamos de acordo nas ideas que nos plantexamos e despois do verán poñerémonos a traballar e teremos perfectamente informados aos membros da asociación de comerciantes dos pasos que se vaian dando”.